બોરતળાવ, ગંગાજળિયા, ઘોઘારોડ અને એએચટીયુની ટીમની રેઈડ
અરોમા, આયુર થાઈ, ક્રિસ્ટલ અને પટાયા ફેમિલી સ્પાના સંચાલક માલિકો સહિત 12 શખ્સો સામે અલગ-અલગ ચાર ફરિયાદ નોંધાઈ
ભાવનગર: શહેરમાં સ્પાની આડમાં બહારની યુવતીઓ પાસે દેહ વ્યાપાર કરાવવામાં આવતો હોવાનું જિલ્લા પોલીસવડાના ધ્યાને આવતા ભાવનગર પોલીસની જુદી-જુદી ટીમો શહેરના કાળાનાળા અને વાઘાવાડી રોડ પર આવેલા ૪ સ્પા સેન્ટરો પર ડમી ગ્રાહકો મોકલી દરોડા પાડવામાં આવ્યા હતા. જેમાં સ્પાની આડમાં યુવતીઓ પાસે દેહ વ્યાપાર કરાવવામાં આવતો હોવાનું ખુલતા પોલીસે ચાર સ્પા સેન્ટરના સંચાલક અને માલિક સહિત કુલ ૧૨ શખ્સો સામે નિલમબાદ પોલીસ મથકમાં અલગ-અલગ ચાર પોલીસ ફરિયાદ નોંધી છે.
જિલ્લા પોલીસવડાએ ફરી એકવાર શહેરના સ્પા સેન્ટર પર દરોડા પાડી સ્પાની આડમાં થતા દેહ વ્યાપાર વિરૂદ્ધ કાર્યવાહી કરી છે. શહેરમાં સ્પામાં મસાજની આડમાં દેહ વ્યાપાર ચાલતો હોવાનું જિલ્લા પોલીસવડાને ધ્યાને આવતા બોરતળાવ, ઘોઘારોડ, ગંગાજળિયા પોલીસ અને એએચટીયુને શહેરના અલગ-અલગ વિસ્તારમાં ચાલી રહેલા સ્પા સેન્ટરોમાં ડમી ગ્રાહક મોકલી સ્પાની આડમાં દેહ વ્યાપાર ચાલકો હોય તે કાર્યવાહી કરવા માટે ચાર ટીમો બનાવી તપાસ કરવા મોકલી હતી. ભાવનગર પોલીસની ચાર ટીમો દ્વારા ગત મોડી રાત્રિના વાઘાવાડી રોડ પર ઈવા સુરભી મોલમાં આવેલા અરોમા ફેમિલિ સ્પા અને આયુર થાઈ ફેમિલિ સ્પામાં તથા કાળાનાળા વિસ્તારમાં આવેલ શિવા બ્લેસિંગ-૨માં ક્રિસ્ટલ ફેમિલિ સ્પા અને પટાયા ફેમિલિ સ્પામાં ડમી ગ્રાહક મોકલ્યા બાદ દરોડા પાડવામાં આવ્યા હતા. જેમાં બહારની યુવતીઓ પાસે સ્પામાં મસાજની આડમાં દેહવ્યાપાર કરવામાં આવતું હોવાનું ખુલતા નિલમબાગ પોલીસ મથકમાં અલગ-અલગ ચાર પોલીસ ફરિયાદ નોંધી છે. જેમાં અરોમા સ્પાના અનુબેન માયારામ ચૌધરી, નિત્યરાજ, પ્રકાશ ચૌહાણ વિરૂદ્ધ, આયુર થાઈ ફેમિલિ સ્પાના અજય અશોકભાઈ મકવાણા અને શબાનાબેન ફારૂકભાઈ થીમ વિરૂદ્ધ, ક્રિસ્ટલ ફેમિલિ સ્પાના સાહિલ ઉર્ફે ગોલ્ડન મહેબુબભાઈ ડોડિયા અને શબાનાબેન ફારૂકભાઈ થીમ વિરૂદ્ધ તથા પટાયા ફેમિલિ સ્પાના દાનિશ આરીફભાઈ સૈયદ, સંજયસિંહ ઘનશ્યામસિંહ ગોહિલ, યક્ષ પ્રકાશભાઈ પટેલ, મુયર કિશોરભાઈ પટેલ, મયુર કિશોરભાઈ વાજા, નત્નીચા બૂન્સન્સુન બુન્વાંગ્મા અને જાહિદ ઉસ્માનભાઈ સૈયદ વિરૂદ્ધ ધ ઈમોરલ ટ્રાફિક એક્ટની કલમ હેઠળ ગુનો નોંધ્યો છે. પોલીસ તપાસમાં લાઈસન્સ રદ્ થયું હોવા છતાં સ્પા માલિકો અલગ-અલગ નામથી સ્પા ચલાવતા હોવાનું ખુલ્યું હતું.
પોલીસે 12 મહિલાઓને મુક્ત કરાવી, દબાણ કરી દેહ વ્યાપાર કરાવાતો હતો
દરોડા દરમિયાન ચારેય સ્પા સેન્ટરોમાં નોકરી કરતી દિલ્હી, મુંબઈ, ઉત્તરપ્રદેશ અને થાઈલેન્ડની કુલ ૧૨ યુવતીઓને પોલીસે મુક્ત કરાવી હતી. પોલીસની પુછપરછમાં તેમને દબાણ કરીને ગ્રાહકોને સર્વિસ પુરી પાડવાનું કહેવામાં આવતું હતું અને અહીંથી જવા નહી દઈએ તેવી ધમકી આપવામાં આવતી હતી.
