અમદાવાદ,શનિવાર
દાણીલીમડામાં એક સપ્તાહ પહેલા સવારના સમયે કોઇ વ્યક્તિએ ૨૫ વર્ષની માનસિક અસ્થિર યુવતીને સ્કૂટર પર અવાવરૂ જગ્યા પર લઇને દુષ્કર્મ આચર્યું હતું. આ કેસમાં ક્રાઇમબ્રાંચે ઘટના સ્થળની આસપાસના ૫૦થી વધુ સીસીટીવી ફુટેજ અને બાતમીદારોની મદદથી કેટલાંક શકમંદોેને ચકાસ્યા બાદ દુષ્કર્મના આરોપીને ઝડપી લીધો હતો. ૧૮ વધુ ગંભીર ગુનામાં સંડોવાયેલો આરોપીની સંડોવણી અન્ય ગુનામાં હોવાની શક્યતાને આધારે પોલીસે વધુ તપાસ શરૂ કરી ઠછે.
શહેરના દાણીલીમડામાં રહેતી ૨૫ વર્ષની માનસિક અસ્થિર યુવતીને સ્કૂટર પર આવેલો વ્યક્તિ ઉધરસની દવા અપાવવાનું કહીને વહેલી સવારે અવાવરૂ જગ્યા પર લઇ ગયો હતો. જ્યાં તેની સાથે દુષ્કર્મ આચરીને છોડીને નાસી ગયો હતો. સવારના સમયે દીકરી અચાનક ગુમ થતા તેના માતા પિતાએ તપાસ કરતા તે ઘરેથી દુર મળી આવી હતી અને તેની સાથે કોઇ દુષ્કર્મ આચર્યુ હોવાનું જણાતા તેના પિતાએ દાણીલીમડા પોલીસ મથકે ફરિયાદ નોંધાવી હતી. પરંતુ, યુવતી તેની સાથે દુષ્કર્મ આચરનારને ઓળખતી નહોતી અને સીસીટીવીમાં જોતા સ્કૂટરનો નંબર નહોતો. જેથી પોલીસ માટે ખુબ જટીલ હતુ. બીજી તરફ ક્રાઇમબ્રાંચના પીઆઇ આઇ એન ઘાસુરાએ યુવતીના ઘરેથી ઘટના સ્થળ વચ્ચેના ૫૦થી વધુ સીસીટીવી ફુટેજ તપાસ્યા હતા. તેમજ આ વિસ્તારમાં મોબાઇલ લોકેશન તપાસીને કેટલાંક શકમંદોની તપાસ કરીને મયુદ્દીન ઉર્ફે બાબુ શેખ (રહે. સંતોષનગર, દાણીલીમડા)ને ઝડપી લીધો છે.
પરંતુ, માનસિક અસ્થિર યુવતી તેની સાથે અઘટિત કૃૃત્ય કરનારને ઓળખતી ન હોવાથી પોલીસ માટે તમામ કડી જોડવી અઘરી હતી. છેવટે આરોપીની આકરી પુછપરછ અને એક થી બે વ્યક્તિના નિવેદનના આધારે સમગ્ર ગુનાનો ભેદ ઉકેલાયો હતો. આ અંગે વધુ માહિતી આપતા ક્રાઇમબ્રાંચના એસીપી ભરત પટેલે જણાવ્યું હતું કે મયુદ્દીન શેખ ગુનાહિત માનસિકતા ધરાવે છે. ખાસ કરીને પશુઓની ચોરી અને કતલ, પ્રોહીબીશનના ૧૭ ગંભીર ગુના અને ચાર વાર પાસા હેઠળ પણ કાર્યવાહી થઇ હતી. સાથે સાથે આરોપી પોલીસ કસ્ટડીમાં પોતાના પર જાતે ઇજા પહોંચાડવા સુધીના કૃત્ય કરી શકે તેવી માનસિકતા ધરાવે છે.
