Heavy Rain Alert In 17 States : ચોમાસાએ ફરી એકવાર ગતિ પકડી લીધી છે, અને ઝારખંડ, બિહાર સહિત ઘણા રાજ્યોમાં ચોમાસું ઝડપથી આગળ વધી રહ્યું છે. આ દરમિયાન હવામાન વિભાગે 12 કલાકની અંદર દેશના 17 રાજ્યોમાં વાવાઝોડા અને વરસાદનું ઍલર્ટ જાહેર કર્યું છે. આ સમયગાળા દરમિયાન 80 કિલોમીટર પ્રતિ કલાકની ઝડપે તેજ પવન ફૂંકાઈ શકે છે. હવામાન વિભાગે આવતીકાલે એટલે કે 19 જૂને 17 રાજ્યોમાં ભારે વરસાદ સાથે વાવાઝોડાનું ઍલર્ટ જાહેર કર્યું છે. IMD(હવામાન વિભાગ)ના પૂર્વાનુમાન મુજબ, આ અઠવાડિયે ઉત્તર-પૂર્વ ભારત અને ઉપ-હિમાલયી પશ્ચિમ બંગાળ તેમજ સિક્કિમના લોકોની મુશ્કેલીઓ વધવાની છે, કારણ કે અહીં ભારે વરસાદ થવાની સંભાવના છે. કેટલીક જગ્યાએ વીજળી પડવાની પણ આશંકા છે.
હવામાન વિભાગના જણાવ્યા અનુસાર, ચોમાસાની ઉત્તરીય સરહદ હરનાઈ, સોલાપુર, હૈદરાબાદ, કોરાપુટ, ફૂલબની, રાંચી, જમુઈ અને મુઝફ્ફરપુર પરથી પસાર થઈ રહી છે. આગામી 4-5 દિવસ દરમિયાન તેલંગાણા, ઓડિશા, ઝારખંડ અને બિહારના કેટલાક વધુ ભાગોમાં તેમજ છત્તીસગઢના કેટલાક ભાગોમાં દક્ષિણ-પશ્ચિમ ચોમાસું આગળ વધવા માટે સાનુકૂળ પરિસ્થિતિઓ છે.
17 રાજ્યોમાં વાવાઝોડા-વરસાદનું ઍલર્ટ
બિહાર, ઝારખંડ, ઓડિશા, રાજસ્થાન, મધ્યપ્રદેશ અને જમ્મુ-કાશ્મીર સહિત અનેક રાજ્યોમાં ગાજવીજ સાથે તેજ પવન ફૂંકાવાની શક્યતા છે. આ દરમિયાન ઘણા વિસ્તારોમાં 70થી 80 કિલોમીટર પ્રતિ કલાકની ઝડપે પવન ફૂંકાઈ શકે છે. જ્યારે ઉત્તર-પૂર્વ ભારતના અરુણાચલ પ્રદેશ, આસામ, મેઘાલય, નાગાલૅન્ડ, મણિપુર, મિઝોરમ અને ત્રિપુરામાં 19થી 24 જૂન વચ્ચે ભારે વરસાદની સંભાવના છે. આસામ અને મેઘાલયમાં 19થી 22 જૂન દરમિયાન અત્યંત ભારે વરસાદનું અનુમાન છે.
દિલ્હી-NCRમાં આવતીકાલે કેવું રહેશે હવામાન?
દિલ્હીમાં વાવાઝોડા-વરસાદની સંભાવના (19-21 જૂન): હવામાન વિભાગના જણાવ્યા અનુસાર, દિલ્હીમાં આવતીકાલે એટલે કે 19 જૂને આંશિક વાદળછાયું વાતાવરણ રહેશે. સવારે અથવા બપોરે હળવા વરસાદ સાથે વાવાઝોડું આવવાની શક્યતા છે. આ દરમિયાન પવનની ગતિ 60 કિલોમીટર પ્રતિ કલાક સુધી પહોંચી શકે છે. આ સાથે શુક્રવારે તાપમાન 42 ડિગ્રી સેલ્સિયસ સુધી પહોંચી શકે છે. જ્યારે 20 અને 21 જૂને પણ ધૂળની ડમરીઓ સાથે વાવાઝોડું આવવાની શક્યતા છે. 20 જૂનથી તાપમાનમાં થોડો ઘટાડો થઈ શકે છે.
UP(ઉત્તર પ્રદેશ)માં આવતીકાલે કેવું રહેશે હવામાન?
ઉત્તર પ્રદેશમાં હીટવેવ(લૂ)નું ઍલર્ટ (19-22 જૂન): મેરઠ, બિજનૌર, બરેલી, શાહજહાંપુર, બદાયું, પીલીભીત, હરદોઈ, સીતાપુર, બહરાઈચ, બારાબંકી, કાનપુર દેહાત, લખનઉ, બલરામપુર, ગોંડા, ઉન્નાવ, હમીરપુર, મહોબા, ચિત્રકૂટ, કૌશામ્બી, પ્રયાગરાજ, વારાણસી, ગાઝીપુર સહિત રાજ્યના અનેક જિલ્લાઓમાં હવામાન વિભાગે 19 જૂને હીટવેવનું ઍલર્ટ જાહેર કર્યું છે. હવામાન વિભાગે પૂર્વીય યુપી અને પશ્ચિમી યુપીમાં 19થી 24 જૂન સુધી લૂની સંભાવના વ્યક્ત કરી છે. જોકે, કેટલાક સ્થળોએ ગાજવીજ સાથે હળવો વરસાદ પણ થઈ શકે છે.
બિહારમાં આવતીકાલે કેવું રહેશે હવામાન?
બિહારમાં વાવાઝોડા અને વરસાદનું ઍલર્ટ (19-22 જૂન): પશ્ચિમ ચંપારણ, ગોપાલગંજ, સિવાન, સારણ, પૂર્વ ચંપારણ, બાંકા, કટિહાર, મુંગેર, જમુઈ, બેગુસરાય, નાલંદા, શેખપુરા, નવાદા, ગયા, પટણા સહિત ઘણાં જિલ્લાઓમાં હવામાન વિભાગે 19 જૂને ગાજવીજ સાથે વરસાદનું ઍલર્ટ આપ્યું છે. જ્યારે સમસ્તીપુરમાં ભારે વરસાદનું ઍલર્ટ છે. પૂર્વાનુમાન મુજબ, ગાજવીજ સાથે વાવાઝોડા અને વરસાદનો આ સિલસિલો રાજ્યના અલગ-અલગ જિલ્લાઓમાં 22 જૂન સુધી ચાલુ રહેશે. આ દરમિયાન 60 થી 80 કિમી પ્રતિ કલાકની ઝડપે તેજ પવન ફૂંકાઈ શકે છે.
હિમાચલ પ્રદેશમાં આવતીકાલે કેવું રહેશે હવામાન?
ગાજવીજ સાથે મુશળધાર વરસાદનું ઍલર્ટ (19-22 જૂન): IMD એ હિમાચલ પ્રદેશના ત્રણ જિલ્લામાં 19 જૂને મુશળધાર વરસાદનું ઍલર્ટ જાહેર કર્યું છે. હવામાન વિભાગના જણાવ્યા અનુસાર શિમલા, મંડી અને કુલ્લુમાં આવતીકાલે મુશળધાર વરસાદ પડી શકે છે. જ્યારે ચંબા અને કાંગડામાં પણ વરસાદનું યલો ઍલર્ટ જાહેર કરાયું છે. 19થી 22 જૂન દરમિયાન રાજ્યમાં વાવાઝોડા અને કરા સાથે વરસાદ થવાના સંકેત છે.
ઉત્તરાખંડમાં આવતીકાલે કેવું રહેશે હવામાન?
કરા પડવાનું ઍલર્ટ (19 થી 22 જૂન): રુદ્રપ્રયાગ, ચમોલી, પિથોરાગઢ, અલ્મોડા, બાગેશ્વર, નૈનિતાલ, ચંપાવતમાં હવામાન વિભાગે વાવાઝોડા અને વરસાદનું યલો ઍલર્ટ જાહેર કર્યું છે. IMDના જણાવ્યા અનુસાર, પહાડી વિસ્તારોમાં તેજ પવન ફૂંકાઈ શકે છે, અને 19થી 24 જૂન સુધી છૂટોછવાયો વરસાદ ચાલુ રહી શકે છે.
પંજાબમાં આવતીકાલે કેવું રહેશે હવામાન?
વાવાઝોડા-વરસાદનું ઍલર્ટ (19-22 જૂન): પઠાણકોટ, હોશિયારપુર, મુક્તસર, ભટિંડા સહિત પંજાબના જિલ્લાઓમાં હવામાન વિભાગે ગાજવીજ સાથે વરસાદનું ઍલર્ટ જાહેર કર્યું છે. પૂર્વાનુમાન મુજબ, છૂટાછવાયા વરસાદનો આ રાઉન્ડ 22 જૂન સુધી ચાલુ રહેશે. આ દરમિયાન 40થી 60 કિલોમીટર પ્રતિ કલાકની ઝડપે તેજ પવન ફૂંકાઈ શકે છે.
ઓડિશામાં આવતીકાલે કેવું રહેશે હવામાન?
વાવાઝોડા-વરસાદનું ઍલર્ટ (19-22 જૂન): હવામાન વિભાગના જણાવ્યા અનુસાર, ઓડિશામાં 19 અને 20 જૂને વરસાદ પડી શકે છે. 19 જૂને 70 કિલોમીટર પ્રતિ કલાકની ઝડપે તેજ પવન ફૂંકાઈ શકે છે. જ્યારે 20થી 22 જૂન દરમિયાન પણ હળવો વરસાદ ચાલુ રહેશે.
જમ્મુ-કાશ્મીરમાં આવતીકાલે કેવું રહેશે હવામાન?
તેજ પવન સાથે વરસાદનું ઍલર્ટ (19-22 જૂન): કુપવાડા, પૂંછ, પુલવામા, રાજૌરી સહિત જમ્મુ-કાશ્મીરના તમામ જિલ્લાઓમાં હવામાન વિભાગે આવતીકાલે એટલે કે 19 જૂને ગાજવીજ સાથે તેજ પવન અને વરસાદનું યલો ઍલર્ટ જાહેર કર્યું છે. હવામાનનું આ યલો ઍલર્ટ તમામ જિલ્લાઓ માટે 22 જૂન સુધી ચાલુ રહેશે. આ દરમિયાન કેટલાક વિસ્તારોમાં કરા પડવાની પણ સંભાવના છે.
