Baroda Cricket Association : બીસીએ (બરોડા ક્રિકેટ એસોસિએશન) દ્વારા આગામી 3 એપ્રિલે એપેક્ષ કમિટિની બેઠક બોલાવવામાં આવતા વિવાદ સર્જાયો છે. હાઈકોર્ટ દ્વારા આપવામાં આવેલી શરતો વચ્ચે બેઠક યોજવાનો નિર્ણય ચર્ચાનું કેન્દ્ર બન્યો છે.
હાઈકોર્ટે તાજેતરમાં બીસીએને માત્ર રૂટીન અને દૈનિક વહીવટી કામગીરી ચાલુ રાખવા માટે જ મંજૂરી આપી છે. સાથે જ કોર્ટે સ્પષ્ટ કહ્યું છે કે, કોઈપણ નીતિગત અથવા મોટા નિર્ણયો લેવા નહીં. આવા સંજોગોમાં એપેક્ષ કમિટિની બેઠક બોલાવવામાં આવતા અનેક પ્રશ્નો ઊભા થયા છે.
હાલ ચૂંટણીમાં ઉમેદવારી નોંધાવનારા કેટલાક એપેક્ષ કમિટિના સભ્યોને આમંત્રણ આપવામાં આવ્યું નથી. જેના કારણે પ્રક્રિયાની ન્યાયસંગતતા અને પારદર્શિતા અંગે શંકા ઊભી થઈ છે. ક્રિકેટ સાથે સંકળાયેલા વર્તુળોમાં એવી ચર્ચા છે કે જો બેઠક દરમિયાન કોઈ મહત્વપૂર્ણ નિર્ણય લેવાશે, તો તે હાઈકોર્ટના આદેશનો ભંગ ગણાઈ શકે છે.
બીસીએના સૂત્રોનું કહેવું છે કે, હાઈકોર્ટના નિર્દેશ મુજબ જ બેઠક યોજાશે અને તેમાં તમામ શરતોનું પાલન કરવામાં આવશે. જો કે, વિવાદ અંગે સત્તાવાર પ્રતિક્રિયા આપવાનું જવાબદાર અધિકારીઓએ ટાળ્યું છે.
બીસીએની અપીલની તા.7એપ્રિલે સુનાવણી
બીસીએની ચૂંટણીમાં રિવાઇવલ જૂથના પ્રમુખ પદના ઉમેદવાર કિરણ મારે સહિતના ચાર ઉમેદવારોની ઉમેદવારીને ગેરલાયક ઠરાવતા હાઈકોર્ટના સિંગલ જજના ચુકાદાને બીસીએ દ્વારા હાઈકોર્ટની ખંડપીઠ સમક્ષ લેટર્સ પેટન્ટ અપીલ દાખલ કરી છે. અપીલની સુનાવણી તા.7મી એપ્રિલના રોજ મુકરર કરી છે. ત્યાં સુધી વચગાળાની વ્યવસ્થાના ભાગરૂપે વર્તમાન કાર્યકારી કમિટિને ડે ટુ ડે કામ કરવાની લીલીઝંડી આપી છે.
એપેક્સ બેઠક મળે તો એ ગેરકાયદેસર
બીસીએના વહીવટ માટે હંગામી (કેર ટેકર) વ્યવસ્થા કરવાની સ્પષ્ટ સૂચના છે. કેર ટેકર બોડીમાં માત્ર ઓફિસ બેરરનો જ સમાવેશ થાય છે. હાલ એપેક્ષ કમિટિની ટર્મ પૂર્ણ થઈ ચૂકી હોવાને કારણે તેનું અસ્તિત્વ નથી. સેક્રેટરીને સ્વતંત્ર રીતે નિર્ણય લેવાનો અધિકાર નહીં. કેર ટેકરની બેઠકમાં સેક્રેટરી હાજર રહી શકે, પરંતુ એપેક્ષ તરીકે નહીં. કોઈ એજન્ડા વગર અથવા ખાનગી રીતે મળતી એપેક્ષ બેઠક ગેરકાયદેસર ગણાશે. આવી બેઠકમાં લેવાયેલા નિર્ણયો પણ ગેરકાયદેસર ગણાશે. તેવું ચૂંટણીમાં સેક્રેટરી પદના ઉમેદવાર અને પૂર્વ ઉપપ્રમખનું કહેવું છે.
