Amarnath Yatra 2026: જમ્મુ-કાશ્મીરના ઉપરાજ્યપાલ મનોજ સિન્હાની અધ્યક્ષતામાં મળેલી બોર્ડની બેઠકમાં અમરનાથ યાત્રાને લઈને અનેક મહત્વના નિર્ણયો લેવામાં આવ્યા છે. બેઠક બાદ માહિતી આપતા જણાવવામાં આવ્યું હતું કે, આ વર્ષે યાત્રા 3 જુલાઈથી શરૂ થઈને 28 ઓગસ્ટ સુધી ચાલશે. કુલ 57 દિવસ સુધી ચાલનારી આ પવિત્ર યાત્રા માટે નોંધણીની પ્રક્રિયા 15 એપ્રિલથી શરૂ થશે. વહીવટીતંત્ર મુજબ આ વખતે શ્રદ્ધાળુઓની સંખ્યામાં લગભગ 25 ટકાનો વધારો થવાની સંભાવના વ્યક્ત કરવામાં આવી છે.
ઓનલાઈન અને ઓફલાઈન બંને રીતે નોંધણી
યાત્રાનો લાભ લેવા શ્રદ્ધાળુઓની લઘુત્તમ વય 13 વર્ષ અને મહત્તમ વય 70 વર્ષ નક્કી કરવામાં આવી છે. યાત્રીઓની સુવિધા માટે ઓનલાઈન અને ઓફલાઈન બંને રીતે નોંધણીની વ્યવસ્થા કરવામાં આવી છે. PNB, SBI, યસ બેંક અને જમ્મુ-કાશ્મીર બેંકની દેશભરમાં આવેલી 554 શાખાઓ પર ઓફલાઈન રજિસ્ટ્રેશન કરાવી શકાશે. આ ઉપરાંત, ઓનલાઈન રજિસ્ટ્રેશનની સુવિધા શ્રાઈન બોર્ડની સત્તાવાર વેબસાઈટ અને મોબાઈલ એપ પર ઉપલબ્ધ રહેશે.
સુવિધાઓ વધારવામાં આવી
યાત્રાને વધુ સુરક્ષિત અને વ્યવસ્થિત બનાવવા માટે આ વખતે RFID કાર્ડ જેવી નવી સુવિધાઓ શરૂ કરવામાં આવી છે. આ ઉપરાંત શ્રદ્ધાળુઓ માટે સામૂહિક અકસ્માત વીમો 5 લાખ રૂપિયાથી વધારીને 10 લાખ રૂપિયા કરી દેવામાં આવ્યો છે. સાથે જ, ઘોડા માલિકોને મોટી રાહત આપતા, ઘોડાના મૃત્યુના કિસ્સામાં 50 હજાર રૂપિયાનું વળતર આપવાની જોગવાઈ કરવામાં આવી છે. યાત્રાના રસ્તાઓને સુગમ બનાવવા માટે બંને મુખ્ય રસ્તાઓનું પહોળીકરણ કરવામાં આવ્યું છે.
આ પણ વાંચો: આશા ભોસલેનું ‘મોસાળ’ હતું ગુજરાત: ગુજરાતી માતાના સંસ્કારોએ તેમને બનાવ્યા હતા સંગીતના સામ્રાજ્ઞી
200 બેડની હોસ્પિટલ તૈયાર
બાલટાલમાં નવું ‘યાત્રી નિવાસ’ કાર્યરત કરી દેવામાં આવ્યું છે, જ્યારે શ્રીનગરમાં પણ એક યાત્રી નિવાસ કાર્યરત છે. સુરક્ષાને ધ્યાનમાં રાખીને સેના અને અન્ય અર્ધલશ્કરી દળો તૈનાત કરવામાં આવ્યા છે. હવામાનની ચોક્કસ માહિતી માટે ડોપ્લર રડાર પણ લગાવવામાં આવ્યું છે. સાથે જ, શ્રદ્ધાળુઓની આરોગ્ય સેવાઓને ધ્યાનમાં રાખીને 200 બેડની હોસ્પિટલ પણ તૈયાર કરવામાં આવી છે. વહીવટીતંત્રનું કહેવું છે કે આ વર્ષની અમરનાથ યાત્રાને સુરક્ષિત, સરળ અને સુવિધાજનક બનાવવા માટે વ્યાપક સ્તરે તૈયારીઓ કરવામાં આવી છે.
1: ઓનલાઈન રજીસ્ટ્રેશન
વેબસાઇટ: શ્રી અમરનાથજી શ્રાઈન બોર્ડ (SASB) ની સત્તાવાર વેબસાઇટ jksasb.nic.in પર જાઓ.
વિગતો ભરો: ‘Online Services’ વિભાગમાં જઈને ‘Register’ પર ક્લિક કરો અને તમારી વ્યક્તિગત વિગતો ભરો.
દસ્તાવેજો અપલોડ કરો: તમારે તમારો ફોટો અને ફરજિયાત હેલ્થ સર્ટિફિકેટ (CHC) સ્કેન કરીને અપલોડ કરવું પડશે.
ફી ચૂકવો: રજીસ્ટ્રેશન ફી ઓનલાઈન ભરો. સફળતાપૂર્વક પૂર્ણ થયા પછી, તમે તમારું યાત્રા પરમિટ (Yatra Permit) ડાઉનલોડ કરી શકશો.
2: ઓફલાઈન રજીસ્ટ્રેશન
જો તમે રૂબરૂ જઈને નોંધણી કરાવવા માંગતા હોવ, તો નિયુક્ત બેંકોની શાખાઓ દ્વારા કરી શકો છો:
નિયુક્ત બેંકો: સામાન્ય રીતે PNB, જમ્મુ-કાશ્મીર બેંક, SBI અને યસ બેંકની અમુક શાખાઓમાં આ સુવિધા હોય છે.
ફોર્મ: બેંકમાંથી રજીસ્ટ્રેશન ફોર્મ મેળવો અથવા વેબસાઈટ પરથી ડાઉનલોડ કરો.
દસ્તાવેજો: ફોર્મની સાથે આધાર કાર્ડ, ફોટોગ્રાફ્સ અને અધિકૃત ડોક્ટર દ્વારા આપેલું હેલ્થ સર્ટિફિકેટ જમા કરાવવાનું રહેશે.
અન્ય જરૂરી બાબતો
ફરજિયાત સ્વાસ્થ્ય પ્રમાણપત્ર (CHC): અમરનાથ યાત્રા માટે શ્રાઈન બોર્ડ દ્વારા માન્યતા પ્રાપ્ત ડોક્ટર પાસેથી જ હેલ્થ સર્ટિફિકેટ લેવું પડે છે. માન્ય હોસ્પિટલોની યાદી પણ વેબસાઇટ પર જોવા મળશે.
વય મર્યાદા: 13 વર્ષથી ઓછી ઉંમરના બાળકો અને 70 વર્ષથી વધુ ઉંમરના વડીલો આ યાત્રા માટે રજીસ્ટ્રેશન કરાવી શકતા નથી. ઉપરાંત, 6 અઠવાડિયા કે તેથી વધુ સમયની ગર્ભવતી મહિલાઓને પણ મંજૂરી નથી.
રૂટની પસંદગી: તમારે નોંધણી વખતે જ નક્કી કરવું પડશે કે તમે પહલગામ રૂટથી જવા માંગો છો કે બાલટાલ રૂટથી.
