Amreli Bhumika Case : અમરેલી જિલ્લાના ખાંભા તાલુકાના ભાડ ગામની એક 25 વર્ષીય યુવતીએ અનાજમાં નાખવાની દવા ખાઈને આત્મહત્યા કરી લીધી હોવાનો ચોંકાવનારો કિસ્સો સામે આવ્યો છે. યુવતીએ પોતાના માતા-પિતાને સંબોધીને એક સુસાઇડ નોટ પણ લખી છે, જેમાં તેણે 28 લાખ રૂપિયાના દેવાનો ઉલ્લેખ કર્યો છે. ભૂમિકા સોરઠિયાના આપઘાત કેસમાં એક નવો અને ચોંકાવનારો ખુલાસો થયો છે. પોલીસ તપાસમાં સામે આવ્યું છે કે ભૂમિકા ટાસ્ક-બેઝ્ડ ફ્રોડનો શિકાર બની હતી અને વધુ વળતર મેળવવાની લાલચ તેને ભારે પડી હતી.
પ્રાથમિક માહિતી અનુસાર, ભૂમિકાને ઇન્સ્ટાગ્રામ અને ટેલિગ્રામ ચેનલો દ્વારા અલગ-અલગ ટાસ્ક આપવામાં આવતા હતા. શરૂઆતમાં તેને નાના રોકાણ, જેમ કે 500 થી 7000 રૂપિયાના રોકાણનું વધુ વળતર આપવામાં આવ્યું હતું. જેથી વિશ્વાસ બેઠો હતો.
જોકે, વધુ નફાની લાલચ આપીને ભૂમિકાને એક VIP ગ્રુપમાં જોઈન્ટ કરાવવામાં આવ્યું હતું. આ ગ્રુપમાં તેને 50 હજાર, એક લાખ, અને દોઢ લાખ રૂપિયા જેવી મોટી રકમોનું રોકાણ કરવાનું કહેવામાં આવ્યું. ઠગોએ ફેક એકાઉન્ટ બનાવીને આ રોકાણ પર મોટો નફો બતાવ્યો હતો.
જ્યારે ભૂમિકા પોતાના રોકાણ કરેલા પૈસા પરત માંગતી હતી, ત્યારે ઠગબાજો તેને પૈસા પરત આપવા માટે વધુ પૈસા આપવાની માંગણી કરતા હતા. પોતાના અગાઉ રોકાણ કરેલા પૈસા પાછા મેળવવાના પ્રયાસમાં ભૂમિકા વધુને વધુ પૈસા આપતી ગઈ, જેના કારણે તે આર્થિક અને માનસિક રીતે ભાંગી પડી હતી.
આ પણ વાંચો: ‘મારી ડેડબોડી ઘરે આવે ત્યારે મને ગળે લગાડી લેજો’, 28 લાખનું દેવું થતાં અમરેલીની યુવતીનો આપઘાત
આ ઘટનાથી જાણવા મળે છે કે કેવી રીતે આવા ટાસ્ક-બેઝ્ડ ફ્રોડ દ્વારા લોકોને લલચાવીને છેતરવામાં આવે છે. પોલીસે આ મામલે વધુ તપાસ હાથ ધરી છે અને ગુનેગારોને ઝડપી પાડવા ચક્રો ગતિમાન કર્યા છે.
ટાસ્ક-બેઝ્ડ ફ્રોડ એક મોટુ દૂષણ, આ રીતે બચો
ટાસ્ક-બેઝ્ડ ફ્રોડ (Task-based Fraud)એ આજકાલ ખુબ જ પ્રચલિત છેતરપિંડીનો એક પ્રકાર છે, જેમાં તમને નાના-નાના ઓનલાઈન કાર્યો જેમ કે YouTube વિડીયો લાઈક કરવા, એપ ડાઉનલોડ કરવી, પ્રોડક્ટ રિવ્યુ લખવા, વગેરે કરીને પૈસા કમાવવાની લાલચ આપવામાં આવે છે. શરૂઆતમાં તમને થોડા પૈસા પણ મળે છે, જેથી વિશ્વાસ કેળવાય, અને પછી મોટી રકમનું રોકાણ કરાવીને છેતરપિંડી કરવામાં આવે છે.
આ પ્રકારના ફ્રોડનો ભોગ ન બનવા માટે નીચે મુજબની બાબતોનું ખાસ ધ્યાન રાખવું જોઈએ:
1. અવાસ્તવિક વળતરની લાલચથી સાવધ રહો
અતિશય ઊંચા વળતર: જો તમને ખુબ જ ઓછા સમયમાં અથવા ન્યૂનતમ પ્રયત્નોથી ‘ગેરંટેડ’ ઊંચા વળતર જેમ કે દિવસના હજારો રૂપિયા કમાવવાની ઓફર મળે, તો તે લગભગ હંમેશા છેતરપિંડી જ હોય છે. કોઈ પણ કાયદેસરની કંપની આટલું ઊંચું વળતર સરળતાથી આપતી નથી.
ક્વિક મની સ્કીમ: આવી યોજનાઓથી દૂર રહો. સાચી કમાણી માટે સમય, પ્રયત્ન અને કૌશલ્યની જરૂર પડે છે.
2. રોકાણ સંબંધિત માગણીઓ પર ધ્યાન આપો
પૈસા ભરવાની માગણી: જો તમને કોઈ પણ ‘ટાસ્ક’ શરૂ કરતા પહેલા કે ‘વધુ કમાણી’ માટે પૈસા ભરવાનું કહેવામાં આવે જેમ કે રજીસ્ટ્રેશન ફી, અપગ્રેડેશન ચાર્જ, ટેક્સ, સિક્યોરિટી ડિપોઝિટ, વગેરે તો તે સ્પષ્ટ સંકેત છે કે આ છેતરપિંડી છે.
‘પ્રમોશનલ ટાસ્ક’ કે ‘પ્રીપેડ ટાસ્ક’: આ શબ્દોનો ઉપયોગ કરીને તમને મોટી રકમ ભરવા માટે લલચાવવામાં આવશે, જ્યાં તમને કહેવામાં આવશે કે ‘આ ટાસ્ક પુરો કરશો તો જ તમને અગાઉની કમાણી મળશે.’
3. અજાણ્યા સ્ત્રોતો પર વિશ્વાસ ન કરો
વોટ્સએપ, ટેલિગ્રામ કે સોશિયલ મીડિયા પર ઓફર્સ: આવા ફ્રોડ મોટાભાગે વોટ્સએપ ગ્રુપ્સ, ટેલિગ્રામ ચેનલ્સ કે ફેસબુક/ઇન્સ્ટાગ્રામ પર જાહેરાતો દ્વારા ફેલાય છે. અજાણ્યા નંબર પરથી આવતા આવા મેસેજ પર ક્યારેય વિશ્વાસ ન કરો.
અજાણ્યા લિંક્સ પર ક્લિક ન કરો: મોકલવામાં આવેલી કોઈપણ લિંક પર ક્લિક કરતા પહેલા તેની ખરાઈ કરો. ફ્રોડ કરનારાઓ ફિશિંગ લિંક્સ મોકલીને તમારી અંગત માહિતી ચોરી શકે છે.
4. કંપની અને પ્લેટફોર્મની તપાસ કરો
કંપનીની સત્તાવાર વેબસાઇટ તપાસો: જો કોઈ કંપનીના નામે ઓફર આવે તો તેની સત્તાવાર વેબસાઇટ, રજીસ્ટ્રેશન વિગતો અને સંપર્ક માહિતી તપાસો. નકલી વેબસાઇટ્સથી સાવધ રહો.
ઓનલાઈન રિવ્યુ અને ફરિયાદો: ગુગલ પર કે અન્ય પ્લેટફોર્મ પર કંપનીના નામ સાથે ‘ફ્રોડ’, ‘સ્કેમ’, ‘રિવ્યુ’ જેવા શબ્દો ઉમેરીને સર્ચ કરો. જો અન્ય લોકોએ સમાન અનુભવો કે ફરિયાદો કરી હોય તો સાવચેત રહો.
કોઈ મોટા પ્લેટફોર્મ જેમ કે Amazon, Flipkartના નામે છેતરપિંડી: છેતરપિંડી કરનારાઓ ઘણીવાર મોટી ઈ-કોમર્સ કંપનીઓ કે બ્રાન્ડ્સના નામનો દુરુપયોગ કરે છે. યાદ રાખો કે આવી કંપનીઓ ક્યારેય તમને ટાસ્ક કરવા માટે સીધા પૈસાની માંગણી કરતી નથી.
5. અંગત માહિતી શેર કરવામાં સાવધાની
OTP કે બેકિંગ માહિતી: કોઈપણ સંજોગોમાં તમારો OTP (વન ટાઈમ પાસવર્ડ), બેંક એકાઉન્ટ ડિટેલ્સ, ક્રેડિટ/ડેબિટ કાર્ડ નંબર, પિન કે CVV જેવી સંવેદનશીલ માહિતી કોઈની સાથે શેર ન કરો.
6. શંકા જાય તો શું કરવું?
બ્લોક કરો અને રિપોર્ટ કરો: જો તમને કોઈ મેસેજ કે કોલ શંકાસ્પદ લાગે, તો તાત્કાલિક તે નંબરને બ્લોક કરો અને સંબંધિત પ્લેટફોર્મ (વોટ્સએપ, ટેલિગ્રામ) પર તેની જાણ કરો.
સાયબર ક્રાઈમ હેલ્પલાઈન: જો તમે છેતરપિંડીનો ભોગ બન્યા હો, તો તાત્કાલિક 1930 હેલ્પલાઈન નંબર પર કોલ કરો અથવા www.cybercrime.gov.in પર ઓનલાઈન ફરિયાદ નોંધાવો.
યાદ રાખો, લાલચ હંમેશા નુકસાન પહોંચાડે છે. જો કોઈ વસ્તુ સાચી હોવા માટે ‘ખૂબ સારી’ લાગતી હોય, તો સંભવ છે કે તે છેતરપિંડી જ હોય. હંમેશા સજાગ રહો અને તમારી મહેનતની કમાણી સુરક્ષિત રાખો.
