61 કિલો તમાકુનો જથ્થો અને જાણીતી બ્રાન્ડના ડુપ્લીકેશન માટેના સાધનો સાથે 15,100 પડીકી કબજે
સુરત, અમરેલી : સુરતના વરાછા લંબે હનુમાન રોડ તિરુપતીનગર સોસાયટીના એક મકાનમાં જાણીતી બ્રાન્ડની ડુપ્લીકેટ તમાકુનું કારખાનું ઝડપાયું છે. અહીથી 15,100 પડીકી, 61 કિલો તમાકુ સહિત મુદ્દામાલ સાથે સાવરકુંડલાના યુવાનની ધરપકડ કરવામાં આવી છે. પોલીસ સૂત્રો દ્વારા પ્રાપ્ત થતી વિગતો મુજબ હેડ કોન્સ્ટેબલ સહદેવસિંહ મહીપતસિંહ અને કરણસિંહ શંકરસિંહને મળેલી બાતમીના આધારે એલસીબી ઝોન ની સ્ક્વોડે વરાછા લંબે હનુમાન રોડ તિરૂપતીનગર સોસાયટી પ્લોટ નં. 47ના પહેલા માળે રૂમમાં રેઈડ કરતા ત્યાં જાણીતી બ્રાન્ડનું ડુપ્લીકેટ તમાકુ બનાવતું કારખાનું ધમધમતું મળ્યું હતું.એલસીબી ઝોન ૧ ની સ્ક્વોડે સ્થળ પરથી હર્ષદ દલસુખભાઇ કાછડીયા (ઉ.વ. 35, રહે.ઘર નં. 108 પહેલા માળે, સાંઇદર્શન સંકુલ રેસીડન્સી, રામચોક, મોટાવરાછા, ઉત્રાણ, સુરત. મૂળ રહે.નેસડી ગામ, તા.સાવરકુંડલા, જી.અમરેલી) ને ઝડપી પાડી ત્યાંથી તમાકુની ૦.૬૫ ગ્રામની 5,100 પડીકી, 61 કિલો તમાકુ, પડીકી બનાવવાના રોલ, મશીન વિગેરે મળી કુલ રૂ.2,13,750 નો મુદ્દામાલ કબજે કર્યો હતો.
પુછપરછ કરતા જાણવા મળ્યું હતું કે તેણે 20 દિવસ અગાઉ જ અહીં કારખાનું શરૂ કર્યું હતું. છ વર્ષ અગાઉ અમરોલીમાં જાણીતી બ્રાન્ડની ડુપ્લીકેટ તમાકુ બનાવતા ઝડપાયેલા હર્ષદે ફરી આ ધંધો શરૂ કર્યો હતો અને તે નાના પાનના ગલ્લાવાળાનો સંપર્ક કરી તેમને સસ્તામાં પડીકી આપતો હતો.હર્ષદ અગાઉ રત્નકલાકાર તરીકે પણ કામ કરતો હતો અને ત્યારે નવેમ્બર 2021 માં લસકાણા શામળા રો હાઉસમાં સરથાણા પોલીસે જુગારધામ પકડયું હતું ત્યારે ત્યાં જુગાર રમતા ઝડપાયો હતો.
