– મહુવામાં 6 માસ પૂર્વે મસમોટો દારૂનો જથ્થો ઝડપાયાનો મામલો
– પાસા હેઠળ ઝડપાયેલા આરોપીના ભાઈએ મહુવા પોલીસ પર ગંભીર આક્ષેપો કર્યાં
મહુવા : મહુવામાં ૬ માસ પૂર્વે ઝડપાયેલા મસમોટા દારૂના જથ્થાના કેસના મહિલા સહિત પાંચ આરોપીને મહુવા પોલીસ દ્વારા પાસા હેઠળ જેલહવાલે કરવામાં આવ્યા છે. બીજી તરફ પાસા હેઠળ ધકેલવામાં આરોપી પૈકીના એક આરોપીના ભાઈએ મહુવા પોલીસ પર ગંભીર આક્ષેપો કર્યાં હતા. જે અંગે મહુવા એએસપીએ આક્ષેપો સાચા છે કે કેમ તે અંગે તપાસ ચાલી રહી હોવાનું જણાવવામાં આવ્યું છે.
મહુવામાં ૬ માસ પૂર્વે તા.૧૮-૦૨-૨૦૨૫ના રોજ મહુવાના ભવાનીનગરના લાલ ખાંભા વિસ્તારમાંથી બાતમીના આધારે મહુવા ટાઉન પોલીસે ૨૨,૭૫૬ દારૂની બોટલ અને બીયરના ટીન મળી કુલ રૂ.૧.૧૩ કરોડનો મુદ્દામાલ કબ્જે લઈ ગુનો નોંધ્યો હતો. જેમાંથી આ ગુનામાં સામેલ અશોકભાઈ નાથાભાઈ જોલીયા (રહે.માળીયા, તા.મહુવા), ધકુબેન લખમણભાઇ ચૌહાણ (રહે. ચાંચબંદર, તા.રાજુલા, જી.અમરેલી), ચિરાગ ઉર્ફે ચોટુ ધીરુભાઈ બાંભણિયા (રહે.વીટીનગર, તા.મહુવા), કિરણ દામજીભાઈ ચુડાસમા (રહે.મહુવા) અને નરેશ જીલુભાઈ ઠાકરા (રહે.વડલી, તા.રાજુલા, જી.અમરેલી)ને પાસા એક્ટ હેઠળ ઝડપી લઇ વડોદરા મધ્યસ્થ જેલ, સાબરમતી જિલ્લા જેલ-અમદાવાદ અને રાજકોટ મધ્યસ્થ જેલ ખાતે મોકલી દેવાયા છે. બીજી તરફ મહુવાની દિપેશ સોસાયટીમાં રહેતા અને ઉક્ત આરોપી પૈકીના ચિરાગ ઉર્ફે ચોટુના ભાઈ હિતેશભાઈ બાંભણીયાએ મહુવા પોલીસના કર્મચારીઓ પર ગંભીર આક્ષેપો કર્યાં હતા. જેમાં ગત રાત્રિના પોલીસ દ્વારા તેમની કોઈ વોરંટ વિના ગેરકાયદે અટક કરી તેમના સગર્ભા પત્નિને હાજુભાઈ નામના પોલીસ કર્મચારીએ ૨-૩ થપાટ અને ૧ લાત મારી હતી, જેના લીધે તેમના પત્નિ બેહોશ થઈ ગયા હતા અને આવા પોલીસ કર્મચારીઓ સામે કડક કાર્યવાહી કરવામાં આવે તેવી તેમના દ્વારા માંગ કરવામાં આવી હતી.
આક્ષેપો સાચા કે ખોટા તે અંગે તપાસ ચાલી રહી છે : મહુવા એએસપી
આ મામલે મહુવા એએસપી અંશુલ જૈને જણાવ્યું હતું કે, મહુવા ટાઉન પોલીસ પાસાના આરોપીઓની ગત રાત્રિના ધરપકડ કરવા ગઈ હતી. તે દરમિયાન પાસાના આરોપી ચિરાગ ઉર્ફે ચોટુના ભાઈ હિતેશ બાંભણિયાએ આક્ષેપો કર્યાં છે. ખરેખર બનાવ બન્યો છે કે, આરોપીને બચાવવા માટે આ આક્ષેપ કરાયો છે તે બાબતે તપાસ ચાલી રહી છે.
