Vadodara Fraud Case : વડોદરાના છાણી વિસ્તારમાં એક વિધવાને બેન્ક ઓફિસર તરીકે ઓળખાણ આપીને બે ગઠીયાએ સવા તોલા દાગીના કાઢી લીધા હોવાનો બનાવ બન્યો છે.
દુમાડ ગામમાં નવીનગરીમાં રહેતા મધુબેન બચુભાઈ ચાવડા (65 વર્ષ) એ પોલીસને કહ્યું છે કે, મારા પતિનું પેન્શન મહિને બરોડા બેંકમાં જમા થતું હોવાથી ગઈકાલે હું પાસબુકમાં એન્ટ્રી પડાવવા માટે રીક્ષામાં બેંકમાં ગઈ હતી.
પરત ફરતી વખતે ડોક્ટરો ઉપાધ્યાયના દવાખાના પાસે રીક્ષાની રાહ જોતી હતી તે દરમિયાન બે યુવક આવ્યા હતા. જેમાંથી એક જણાએ મને કહ્યું હતું કે અમે બેંકના ઓફિસર છીએ. તમારા પતિ બેંકમાં 9 લાખ મોકલી રહ્યા છે જેમાંથી શરૂઆતમાં તમને અઢી લાખ રૂપિયા મળશે. આ માટે ફોર્મ ભરવું પડશે અને ફોટો આપવો પડશે.
બંને ઠગે છાણી તળાવ પાસે ફોટો પાડ્યો હતો. ત્યારબાદ તેમણે કહ્યું હતું કે અહીં ફોટો સારો આવતો નથી કમાટીબાગ જવું પડશે. જેથી અમે રિક્ષામાં કમાટીબાગ ગયા હતા અને ત્યાં ફોટો પડાવ્યો હતો. આ વખતે બીજા ઠગે ફોટામાં દાગીના આવવાના જોઈએ તેમ કહી કાનમાં પહેરેલા નખલીઓ, બુટ્ટી અને કોકરવા જેવા સવા તોલાના દાગીના કાઢી લીધા હતા. ત્યારબાદ મને ફરી બેન્કમાં લઈ જવામાં આવી હતી અને ત્યાં ફોર્મ પર સહી સિક્કા કરીને આવું છું તેમ કહી ગઠિયો દાગીના લઈને ફરાર થઈ ગયો હતો. જેથી છાણી પોલીસે બનાવની તપાસ હાથ ધરી છે.
