2 સંતાનની માતા સાથે કોર્ટ મેરેજનું તરકટ રચી લગ્ન પહેલા નાણા પડાવી ત્યાર બાદ વકીલને બોલાવી કાગળો કરાવ્યા : એ પછી કન્યા સહિત સૌ છૂમંતર
જામકંડોરણા, : જામકંડોરણા તાલુકાના રાયડી ગામના 40 વર્ષીય લગ્નોત્સુકને નાગપુરની કન્યા અને અન્ય 3 શખ્સો મળી ચાર શખ્સોની ટોળકીએ રૂ. 1.60 લાખ રોકડા અને ટિકિટ ખર્ચનાં રૂ. 60,000 મળી કુલ રૂ. 2 લાખ વસુલી લગ્નનું તરકટ રચ્યા બાદ કન્યા સમેત સૌ નાસી છુટતા મામલો પોલીસ મથકે પહોંચ્યો છે.
રાયડીના નીતિનભાઈ ભીખાભાઈ કંડોરિયા (ઉ.વ. 40)ના જ્ઞાાતિમાં લગ્ન થતા ન હોવાથી તેણે તેમના સ્નેહી મારફત નાગપુર સંપર્ક સાધ્યો હતો. એ પછી તારામાસી મારફત દીપાલી નામની કન્યાને લઈ આવ્યા હતા. આ વેળા તારામાસી સુરેશભાઈ યાસ્કરે લગ્નપૂર્વે રૂ. 1.60 લાખ લીધા હતા. તેની સાથે સોફીયાબેન સૌરભભાઈ ખંડાઈતકર અને સૌરભભાઈ વિજયભાઈ ખંડાઈતકર સાથે હતા. આ પછી બધાએ વકીલ પાસે લગ્નના પેપર તૈયાર કરવાનું તરકટ રચ્યું હતું. તેના પછી તારામાસી અને કન્યા દીપાલી સિવાયના બધા નાગપુર ચાલ્યા ગયા હતા. એ પછી નાગપુરથી કન્યા દીપાલી પર સોફિયાબેનનો ફોન આવ્યો હતો કે તારા દાદીમા ગુજરી ગયા છે. આ વખતે નીતિનભાઈ અને પરિવારજનોએ તાજા લગ્નમાં જવાની ના પાડતા તારામાસીએ કહ્યું હતું કે મારી જવાબદારી પણ જવા દો કહેતા તેને જવા દીધી હતી. ગત તા. 9ના રોજ લગ્નોત્સુક નીતિનભાઈના નંબર પર અજાણ્યાએ ફોન આવ્યો હતો કે દીપાલી તો મારી ઘરવાળી છે મારે બે બાળકો છે. અને બધા નાગપુર ગયા પછી કન્યા પરત ન આવતા 4 સામે છેતરપિંડીની ફરિયાદ નોંધાવી છે.
