– માતા અને પિતાની સંડોવણી ખૂલતા ધરપકડની તજવીજ
– ઘરે ડિલિવરી કરાવતા વધુ રક્તસ્ત્રાવથી સગીરા સારવાર હેઠળ, ડૉક્ટરની દેખરેખમાં બાળક સ્વસ્થ
તારાપુર : તારાપુરના જીચકા ગામની ઝાડીમાંથી શનિવારની પરોઢે નિર્વસ્ત્ર હાલતમાં તરછોડાયેલા નવજાત શિશુને સગીરાએ જન્મ આપ્યો હોવાનો પોલીસ તપાસમાં ઘટસ્ફોટ થયો છે. સગીરાએ બાળકને જન્મ આપ્યા બાદ માતા- પિતાની મદદથી નવજાત શિશુને ઝાડીમાં તરછોડી દીધું હોવાનું ખૂળ્યું છે. પોલીસે સગીરાના માતા- પિતાની ધરપકડની તજવીજ હાથ ધરાઈ છે.
તારાપુર તાલુકાના જીચકા ગામથી ખાનપુર રોડ પર આવેલા ઠાકોર વાસ પાછળના સીમ વિસ્તારની ઝાડીમાંથી શનિવારની પરોઢે ઠાકોરવાસના રહીશોને બાળક રડવાનો અવાજ આવતા નજીક જઈ તપાસ કરતા એક તાજુ જન્મેલું બાળક મળી આવ્યું હતું.
પોલીસને જાણ કરતા તારાપુર પોલીસે બાળકનો કબજો લઈ સારવાર માટે તારાપુર સરકારી હોસ્પિટલ ખાતે ખસેડવામાં આવ્યું હતું. તાજા જન્મેલા બાળકને નિર્વસ્ત્ર હાલતમાં ઝાડીમાં તરછોડી દેવાયેલું હોવાથી શરીરના પગ, મોઢા સહિતના ભાગો પર કાંટા પણ વાગ્યા હતા.
વરસાદી વાતાવરણ અને ખુલ્લી ઝાડીમાં બાળક પડી રહેલું હોવાથી ઠંડુ પડી ગયું હતું. ફરજ પરના ડોક્ટર દ્વારા તાબડતોબ વોર્મર, ઓક્સિજન તથા અન્ય માતાના ફિડિંગ સહિતની પ્રાથમિક સારવાર આપવામાં આવતા હાલ બાળકની હાલત સ્વસ્થ હોવાનું જાણવા મળે છે. જ્યારે સગીરા કુંવારી હોવાથી સમાજમાં આબરૂ જવાની બીકે ઘરે જ ડિલિવરી કરાવાઈ હતી.
માતા- પિતાની મદદથી નવજાતને નિર્વસ્ત્ર હાલતમાં નજીકની ઝાડીમાં તરછોડી દેવાયું હતું. ઘરે જ ડિલિવરી કરાતા સગીરાને વધુ પ્રમાણમાં રક્ત ાવ થઈ જતા હાલ સારવાર હેઠળ હોવાનું જાણવા મળે છે.
નવજાત બાળકને તરછોડી દેવાયા મામલે પોલીસ તપાસમાં માતા અને પિતાની સંડોવણી ખુલતા ધરપકડ કરવાની તજવીજ હાથ ધરાઈ છે.
સમગ્ર મામલે સગીરાની સારવાર બાદ વધુ તપાસ હાથ ધરી આગળની કાર્યવાહી હાથ ધરવામાં આવનાર હોવાનું જાણવા મળે છે.
