– ગટરનો કોન્ટ્રાકટ રદ કરી એજન્સીને બ્લેકલિસ્ટ કરવા માંગ
– વેપારીઓ, રહીશોએ ઉપવાસી છાવણીની મુલાકાત લીધી, વિરમગામ બંધનું એલાન આપવાની ચીમકી ઉચ્ચારી
વિરમગામ : ભાજપ શાસિત વિરમગામ નગરપાલિકાના વોર્ડ નંબર ૬ ભાજપના સદસ્ય અને પક્ષના દંડક શહેરમાં ઉભરાતી ગટરો દૂષિત પીવાનું પાણી સફાઈ અને ભૂગર્ભ ગટરની સમસ્યાને લઇને મંગળવારે અચોક્કસ મુદતના ઉપવાસ પર ઉતર્યા છે. આજે બુધવારે ઉપવાસ આંદોલનના બીજા દિવસે શહેરના વેપારી એસોસિએશને ટેકો આપતા આંદોલને વેગ પકડયું છે.
વિરમગામ શહેરમાં ભૂગર્ભ ગટરના મેન હોલ અને આઈસી ચેમ્બરની સાફ સફાઈ રસ્તા ઉપર ઉભરાતી ગટરની ફરિયાદનું નિવારણ લાવવા માસિક નવ લાખ રૂપિયાના ખર્ચે વાષક કોન્ટ્રાક્ટ હળવદની કુમાર એન્જિનિયરિંગને આપવામાં આવી છે. છતાં ઉભરાતી ગટરની ફરિયાદોનું નિરાકરણ લાવવામાં એજન્સી સંપૂર્ણ નિષ્ફળ નીવડતા વોર્ડ નંબર છના સદસ્ય ઉમેશ વ્યાસ દ્વારા બિલોનું ચુકવણું ન કરવું અને આપેલો કોન્ટ્રાક્ટ રદ કરવા બાબતે નગરપાલિકાના જવાબદાર ચીફ ઓફિસરને અગાઉ બે વખત લેખિતમાં રજૂઆત કર્યા બાદ પણ સમસ્યાનો ઉકેલ નહીં આવતા મંગળવારના રોજ ટાવર ચોકમાં અચોક્કસ મુદતના ઉપવાસ ઉપર બેઠા હતા.
પરંતુ મંગળવારે સાંજના ઉપવાસ ઉપર બેસવાની મંજૂરી ન હોવાથી તંત્ર ભાજપના સદસ્યને ત્યાંથી ખસી જવાનું કહેવામાં આવતા વીપી રોડ ઉપર આવેલી ખાનગી જગ્યામાં આંદોલન ચાલુ રાખવામાં આવ્યું હતું. બીજા દિવસે શહેરના સામાજિક કાર્યકરો, વેપારીઓ, રહીશોએ ઉપવાસી છાવણીની રૂબરૂ મુલાકાત લઈ આંદોલનના સમર્થનમાં ટેકો જાહેર કર્યો હતો. જરૂર પડે વિરમગામ બંધનું એલાન આપવામાં આવશે તેઓ ઉપસ્થિત લોકોએ સુર વ્યક્ત કર્યો હતો. વિરમગામ શહેરના હાર્દ સમાન વીપી રોડ એસોસિએશન દ્વારા જાહેરમાં બોર્ડ મૂકી વેપારીઓએ ઉમેશભાઈ વ્યાસને ટેકો જાહેર કર્યો હતો
