– ઢોલ સાથે પાલિકા કચેરીએ હલ્લાબોલ
– ઠરાવ- ઓર્ડર છતાં તંત્ર ઉદાસીન : ટાઉન હોલ પાસે જગ્યા નહીં તો આંદોલનની ચિમકી
કપડવંજ : કપડવંજ પાલિકા વિસ્તારમાં સરદાર વલ્લભભાઈ પટેલની પ્રતિમા મૂકવા જગ્યા ફાળવવાની માંગણી સાથે આજે હિન્દુ સંગઠનના આગેવાનોએ કચેરીએ હલ્લાબોલ મચાવ્યો હતો.
કપડવંજ પાલિકા કચેરીએ ઢોલ- નગારા સાથે પહોંચેલા પાટીદાર સેના સહિતના હિન્દુ સંગઠનના આગેવાનોએ જણાવ્યું હતું કે, કપડવંજ પાલિકા વિસ્તારમાં સરદાર સાહેબની પ્રતિમા માટે જગ્યા ફાળવવા વારંવાર આવેદનપત્ર આપી રજૂઆત કરવામાં આવી છે. તા. ૧-૧૧-૨૦૧૯ના રોજ પાલિકા તંત્ર દ્વારા જગ્યા ફાળવતો ઠરાવ નં.-૪૭થી ઓર્ડર પણ થયેલો છે. છતાં હજૂ કોઈ કાર્યવાહી કરાઈ નથી. ત્યારે ટૂંક સમયમાં કપડવંજ ટાઉન હોલ તિરંગા ઝંડા પાસે જગ્યા નહીં ફાળવાય તો ઉગ્ર આંદોલનની ચિમકી ઉચ્ચારી છે.
