હાથની નસ કાપી લેતા કર્મચારીઓમાં દોડધામ
ભાવનગરના વતની અને પંચાયત શાખામાં ફરજ બજવતા જૂનિયર ક્લાર્કના આત્મહત્યાના પ્રયાસનું કારણ અકબંધ
આણંદ: આણંદ જિલ્લા પંચાયતની પંચાયત શાખામાં જુનિયર ક્લાર્ક તરીકે ફરજ બજાવતા કર્મચારીએ આજે બપોરે અગમ્ય કારણોસર હાથની નસ કાપી આપઘાતનો પ્રયાસ કરતા કચેરીમાં ધોડધામ મચી ગઈ હતી. ઇજાગ્રસ્ત જુનિયર ક્લાર્કને સારવાર અર્થે હોસ્પિટલમાં ખસેડવામાં આવ્યા હતા.
આણંદ જિલ્લા પંચાયતની પંચાયત શાખામાં મૂળ ભાવનગરના વતની દિગ્વિજયસિંહ જાડેજા જુનિયર ક્લાર્ક તરીકે ફરજ બજાવે છે. આજે બપોરના સુમારે તેઓ ઓફિસમાં ફરજ પર હાજર હતા. ત્યારે કોઈ અગમ્ય કારણોસર કટર વડે હાથની નસ કાપી આપઘાતનો પ્રયાસ કર્યો હતો. સાથી કર્મચારીઓને આ ઘટનાની જાણ થતાં દોડધામ મચી ગઈ હતી. દિગ્વિજયસિંહને લોહી લુહાણ હાલતમાં તુરંત જ સાથી કર્મચારીઓ દ્વારા આણંદની જનરલ હોસ્પિટલમાં સારવાર અર્થે ખસેડવામાં આવ્યા હતા. આ ઘટના અંગે આણંદ શહેર પોલીસને જાણ થતા પોલીસની ટીમ પણ ઘટના સ્થળે દોડી ગઈ હતી.
જોકે જિલ્લા પંચાયતના જુનિયર ક્લાર્કે કયા કારણોસર હાથની નસ કાપી આપઘાતનો પ્રયાસ કર્યો તે અંગેનું રહસ્ય અકબંધ રહેવા પામ્યું છે.
