રાજસ્થાન અને મધ્યપ્રદેશમાં બાળકોના મોત થતાં સાવચેતી : સરકારી દવાખાનાઓમાં ડેક્સટ્રોમેથોર્ફન બેઈઝ કફ સિરપની સપ્લાય થાય છે, જે પણ બાળકો માટે જોખમી
રાજકોટ, : રાજસ્થાન અને મધ્યપ્રદેશમાં કફ સિરપ પીવાથી 12 માસૂમ બાળકોના મોત થયાના અહેવાલો સામે આવ્યા બાદ ત્રણ દિવસે ગુજરાતમાં આરોગ્ય વિભાગ જાગ્યો છે અને વિવાદિત કોલ્ડ્રિફ અને નેક્સટ્રો-ડીએસ કફ સિરપ બાબતે તપાસ કરવાના આદેશ આપ્યા છે. જેના પગલે રાજકોટ સિવિલ હોસ્પટલ પણ એલર્ટ બની છે.
આરોગ્ય વિભાગની પ્રાથમિક તપાસમાં જણાયું છે કે, વિવાદિત કોલ્ડ્રિફ અને નેક્સટ્રો-ડીએસ કફ સિરપ ગુજરાતમાં વેચાતા નથી. પરંતુ કેન્દ્રીય સ્વાસ્થ્ય મંત્રાલયે ખુલાસો કર્યો છે કે, રાજસ્થાન અને મધ્યપ્રદેશમાં બાળકોના મોત નિપજ્યા છે, એ કફ સિરપ ડેક્સટ્રોમેથોર્ફન આધારિત ફોર્મ્યુલેશન છે, જે બાળકોના ઉપયોગ માટે યોગ્ય નથી. આ બાબતે તમામ રાજ્યો અને કેન્દ્રશાસિત પ્રદેશોને 5 વર્ષથી ઓછી ઉંમરના બાળકોને કફ સિરપ આપવા અંગે ખાસ સાવચેતી રાખવાની ગાઈડલાઈન આપવામાં આવી છે. જો કે, ગુજરાતમાં મહાનગરોની સિવિલ હોસ્પિટલોથી માંડીને ગ્રામીણ આરોગ્ય કેન્દ્રો સુધી ગુજરાત મેડીકલ સર્વિસિસ કોર્પોરેશન લિ.ના માધ્યમથી ડેક્સટ્રોમેથોર્ફન કફ સિરપ પહોંચી રહ્યા છે, જે બાળકો માટે જોખમી ગણી શકાય છે.
