– બિહાર મતદાન પ્રક્રિયામાં ધરખમ ફેરફાર, દેશભરમાં પણ અમલ થશે
– બિહારમાં પ્રત્યેક મતદાન બૂથે ૧૨૦૦થી વધુ મતદારો નહીં હોય ઉમેદવારનો રંગીન ફોટો, નામ મોટા અક્ષરોમાં છપાશે
– ૧૦૦ ટકા વેબકાસ્ટિંગથી કોઇ પણ શંકાસ્પદ પ્રવૃત્તિ ઝડપાઇ જશે, અધિકારી તાત્કાલિક કાર્યવાહીના આદેશ આપશે
પટણા: આ વર્ષના અંત સુધીમાં બિહારમાં વિધાનસભાની ચૂંટણી યોજાઇ શકે છે. જોકે બિહારની આ ચૂંટણી ઘણી રીતે અલગ માનવામાં આવે છે. કેમ કે સમગ્ર ચૂંટણી પ્રક્રિયામાં ૧૭ જેટલા સુધારા કરવામાં આવ્યા છે. જેમાં ઇવીએમ પર રંગીન ફોટો, ૧૦૦ ટકા વેબકાસ્ટિંગ તમામનો સમાવેશ કરાશે. મુખ્ય ચૂંટણી કમિશનર જ્ઞાનેશ કુમારે આ તમામ સુધારા વધારા અંગે મીડિયાને માહિતી આપી હતી. આ તમામ સુધારાનો બિહાર બાદ અન્ય રાજ્યોમાં પણ અમલ કરવામાં આવી શકે છે.
તેમણે જણાવ્યું હતું કે બીએલઓ (બૂથ લેવલ ઓફિસર)ને હવે આધુનિક સ્માર્ટ આઇડી કાર્ડ આપવામાં આવ્યા છે. તેઓ જ્યારે મતદાતાઓને મળે ત્યારે તેમને સરળતાથી ઓળખી શકે તે હેતુથી આ સુધારો કરાયો છે. મતદાન કેન્દ્રો પર આવનારા મતદારોએ પોતાના મોબાઇલ ફોન મતદાન બુથ બહાર જમા કરાવવા પડશે. અન્ય એક મોટી જાહેરાત તમામ મતદાન મથકો પર વેબકાસ્ટિંગ કરવાની છે, ચૂંટણી કમિશનરે કહ્યું હતું કે હવે તમામ મતદાન મથકો પર વેબકાસ્ટિંગ કરવામાં આવશે. જેનો ઉદ્દેશ્ય સંપૂર્ણ મતદાન પ્રક્રિયા પર નજર રાખવાનો અને બોગસ વોટિંગ અટકાવવાનો છે. જેને પગલે તમામ મતદાન મથકો કે બૂથ પર ઇન્ટરનેટ કનેક્ટિવિટીની સુવિધા પણ રાખવી પડશે. જે વિસ્તારમાં ઇન્ટરનેટ કનેક્ટિવિટી નહીં હોય ત્યાં વીડિયોગ્રાફી, ફોટોગ્રાફી જેવા વિકલ્પો પર વિચાર કરવામાં આવશે. આ ઉપરાંત અન્ય જે સુધારા કરવામાં આવ્યા છે તે મુજબ હવેથી કોઇ પણ મતદાન બૂથ પર ૧૨૦૦થી વધુ મતદારો નહીં હોય, ઇવીએમ પર લગાવાયેલા બેલેટ પેપરમાં ઉમેદવારોના રંગીન ફોટો હશે, ઉમેદવારોના નામ મોટા અક્ષરોમાં લખવામાં આવશે કે જેથી મતદારોને સરળતાથી વંચાય. જ્યારે તમામ બૂથ પર મતદાન પ્રક્રિયાનું વેબકાસ્ટિંગ કરવામાં આવશે ત્યારે કોઇ ગેરકાયદે કે શંકાસ્પદ પ્રવૃત્તિ થતી જણાય તો તુરંત જ પ્રિસાઇડિંગ કે રિટર્નિંગ ઓફિસર અથવા ઓબ્ઝર્વર જરૂરી પગલા લેશે. સુવિધા ટેબલ ૧૦૦ મીટર દૂર રાખી શકાશે. અગાઉ આ અંતર ૧૫૦ મીટરનું હતું. અન્ય મહત્વનો સુધારો એ છે કે પોસ્ટલ બેલેટની ગણતરી, ઇવીએમની અંતિમ ગણતરીના બે રાઉન્ડ પહેલા પુરી કરવામાં આવશે. હાલમાં આ તમામ સુધારા વધારા બિહારમાં લાગુ કરવામાં આવી રહ્યા છે. ભવિષ્યમાં દેશભરમાં તેનો અમલ કરવામાં આવી શકે છે. જોકે તેને લઇને કેટલાક રાજ્યોમાં વિરોધ પણ થઇ શકે છે.
