રાજકોટ, સુરેન્દ્રનગર પછી ભૂજમાં દેશનું સર્વાધિક તાપમાન નોંધાયું : રાજકોટ, સુરેન્દ્રનગરમાં 43 સે., ડીસામાં 42, જુનાગઢ, અમરેલી, અમદાવાદ, ગાંધીનગર, કેશોદ, કંડલામાં પણ પારો 41 સે.ને પાર
રાજકોટ, : સમગ્ર દેશમાં ઉનાળાના આરંભે સૌથી વધારે તાપમાન સૌરાષ્ટ્ર-કચ્છમાં નોંધાવા સાથે આ પ્રદેશ દેશનો સૌથી ગરમ પ્રદેશ બની રહ્યો છે. ચાર દિવસથી સતત ઉષ્ણલહર સાથે અંગ અંગ દઝાડતી લૂ વર્ષા અવિરત જારી રહી છે. આજે સમગ્ર દેશમાં સૌથી વધુ તાપમાન ભૂજમાં 44.5 સે. નોંધાયું હતું જે છેલ્લે ઈસ 2017માં ભૂજમાં એપ્રિલ માસના સર્વાધિક તાપમાન કરતા વધુ એટલે કે 8 વર્ષનું સૌથી વધુ છે. આ સિલસિલો જારી રહે તો ગરમીમાં સદીનો રેકોર્ડ તૂટવાની ભીતિ છે.
કચ્છની સાથે રણપ્રદેશથી દૂર આવેલા છતાં રાજકોટમાં તેમજ સુરેન્દ્રનગરમાં માત્ર રાજ્યનું નહીં પણ દેશનું સર્વાધિક તાપમાન નોંધાઈ રહ્યું છે. ભૂજ પછી આજે વધારે તાપમાન સુરેન્દ્રનગરમાં 43.2 અને રાજકોટમાં 42.9 સે. નોંધાયું હતું. રાજકોટમાં ગીચ વિસ્તારોમાં તો 45થી 46 સે.તાપમાન સેન્સરોમાં નોંધાયું છે.
આ ઉપરાંત આજે જુનાગઢ, કેશોદ, અમદાવાદ, ગાંધીનગર, અમરેલીમાં પણ પારો ઉંચકાઈને 41 સે.ને પાર થયો હતો. જ્યારે ડીસા અને કંડલા એરપોર્ટ ખાતે 42 સે. તાપમાન સાથે તીવ્ર તાપથી લોકો ત્રાહિમામ પોકાર્યા હતા. હીટવેવની ચેતવણી વધારીને રાજકોટ,કચ્છમાં આગામી તા. 9 સુધી ઓરેન્જ એલર્ટ જારી કરાયું છે જેનો અર્થ એ છે કે બિમાર,વૃધ્ધો,બાળકો,સગર્ભા મહિલા વગેરે માટે તડકાંથી સ્વાસ્થ્ય પર જોખમ સર્જાઈ શકે છે અને તકેદારીના પગલા લેવા સૂચવે છે. સૌરાષ્ટ્ર ઉપરાંત ગાંધીનગર, પાટણ, મહેસાણા, બનાસકાંઠા, સાબરકાંઠા સહિત જિલ્લાઓમાં પણ તા. 6 એપ્રિલને રવિવારથી હીટવેવનું યલો એલર્ટ તા. 9 સુધી જારી કરાયું છે.
