– એક શિક્ષકવાળી શાળાઓમાં કુલ ૩૩ લાખ વિદ્યાર્થીઓ ભણે છે
– એક શિક્ષક ધરાવતી સૌથી વધુ ૧૨,૯૧૨ શાળાઓ આંધ્ર પ્રદેશમાં આવેલી છે : કેન્દ્રીય શિક્ષણ મંત્રાલય
– ઉત્તર પ્રદેશમાં સૌથી વધુ ૬,૨૪,૩૨૭ વિદ્યાર્થીઓ એક શિક્ષકથી ચાલતી શાળાઓમાં ભણી રહ્યાં છે
નવી દિલ્હી: સમગ્રે દેશમાં એક લાખથી વધારે શાળાઓ એવી છે જેમાં ફક્ત એક જ શિક્ષક છે અને આવી શાળાઓમાં કુલ ૩૩ લાખથી વધુ વિદ્યાર્થીઓ ભણી રહ્યાં છે તેમ સત્તાવાર આંકડાઓમાં જણાવવામાં આવ્યું છે.
આ આંકડાઓ અનુસાર એક જ શિક્ષક ધરાવતી સૌથી વધુ શાળાઓ આંધ્ર પ્રદેશમાં આવેલી છે. શિક્ષણ મંત્રાલયના આંકડા અનુસાર શૈક્ષણિક વર્ષ ૨૦૨૪-૨૫માં ભારતમાં એક શિક્ષકથી ચાલતી ૧,૦૪,૧૨૫ શાળાઓ છે.
એક શિક્ષકથી ચાલતી શાળાઓમાં ભણતા કુલ વિદ્યાર્થીઓની સંખ્યા ૩૩,૭૬,૭૬૯ છે. એટલે કે આવી એક શાળામાં સરેરાશ ૩૪ વિદ્યાર્થીઓ ભણી રહ્યાં છે.
શિક્ષણનો અધિકાર કાયદો, ૨૦૦૯ અનુસાર પ્રાથમિક સ્તરે ધોરણ ૧ થી ૫માં ૩૦ બાળકોએ એક શિક્ષક અને ઉચ્ચ પ્રાથમિક સ્તરે ધોરણ ૬ થી ૮માં ૩૫ બાળકોએ એક શિક્ષક ફરજિયાત છે.
એક શિક્ષક ધરાવતી સૌથી વધુ શાળાઓ આંધ્ર પ્રદેશમાં આવેલી છે. ત્યારબાદ ઉત્તર પ્રદેશ, ઝારખંડ, મહારાષ્ટ્ર, કર્ણાટક અને લક્ષદ્વીપનો ક્રમ આવે છે. ઉત્તર પ્રદેશમાં સૌથી વધુ વિદ્યાર્થીઓ એક શિક્ષક ધરાવતી શાળાઓમાં ભણે છે.ત્યારબાદ ઝારખંડ, પશ્ચિમ બંગાળ અને મધ્ય પ્રદેશનો ક્રમ આવે છે.
આંકડાઓ અનુસાર શૈક્ષણિક વર્ષ ૨૦૨૨-૨૩માં એક શિક્ષક ધરાવતી શાળાઓની સંખ્યા ૧,૧૮,૧૯૦ હતી જે શૈક્ષણિક વર્ષ ૨૦૨૩-૨૪માં ઘટીને ૧,૧૦,૯૭૧ થઇ ગઇ હતી.
એક શિક્ષક ધરાવતી શાળાઓ આંધ્ર પ્રદેશમાં ૧૨,૯૧૨, ઉત્તર પ્રદેશમાં ૯૫૦૮, ઝારખંડમાં ૯૧૭૨, પશ્ચિમ બંગાળમાં ૬૪૮૨, રાજસ્થાનમાં ૬૧૧૭, છત્તીસગઢમાં ૫૯૭૩ અને તેલંગણામાં ૫૦૦૧ છે.
ઉત્તર પ્રદેશમાં એક શિક્ષક ધરાવતી શાળાઓમાં ભણતા વિદ્યાર્થીઓની સંખ્યા ૬,૨૪,૩૨૭ છે. આવી શાળાઓમાં ભણતા વિદ્યાર્થીઓની સંખ્યા ઝારખંડમાં ૪,૩૬,૪૮૦, પશ્ચિમ બંગાળમાં ૨,૩૫,૪૯૪, મધ્ય પ્રદેશમાં ૨,૨૯,૦૯૫, કર્ણાટકમાં ૨,૨૩,૧૪૨, આંધ્ર પ્રદેશમાં ૧,૯૭,૧૧૩ અને રાજસ્થાનમાં ૧,૭૨,૦૭૧ છે.
