સુરત પાલિકાની સામાન્ય સભામાં પ્રશ્ન પૂછવાના મુદ્દે થયેલા બખેડા બાદ વિપક્ષના બે કોર્પોરેટર સામે આપ માંથી ભાજપમાં આવેલા મહિલા નગરસેવકે એક્ટ્રોસિટી ફરિયાદ નોંધાવી છે. આ મુદ્દે પાલિકાની સતત બીજી સભામાં શાસક પક્ષના કોર્પોરેટરોએ હોબાળો મચાવ્યો હતો. જ્યાં સુધી માફી ન માંગે ત્યાં સુધી મહિલાનું જાતિ વિષયક અપમાન કરનારા નગર સેવકોને બોલવા દેવામાં આવશે નહીં તે મુદ્દે ભાજપના કોર્પોરટેરો અડી ગયા હતા. તો બીજી તરફ વિપક્ષે કહ્યું ભૂલ કરી હોય તો માફી માંગવાની, ભુલ ન કરી હોય તો માફી માંગવાનો સવાલ નથી તેવું કહેતા ભારે હોબાળો થયો હતો. જોકે, આ હોબાળા સાથે બન્ને કોર્પોરેટરોને સસ્પેન્ડ કરવામા આવ્યા હતા.
દિવાળી પહેલા સુરત પાલિકાની સામાન્ય સભામાં ફરી એક વખત મહિલા કોર્પોરેટરના અપમાનનો મુદ્દો ઉછળ્યો હતો. સામાન્ય સભામાં દરખાસ્ત પર બોલવા માટે વિપક્ષના ઉપનેતા મહેશ અણઘડ ઉભા થયા હતા ત્યારે ભાજપના કોર્પોરેટરો એક સાથે ઉભા થઈ ગયા હતા અને મહેશ અણઘડ અને રચના હીરપરા જેએઓએ અપમાન કર્યું છે તેઓ માફી માંગે ત્યાર બાદ જ તેમને બોલવા દેવામાં આવશે તેવી વાત કરી હતી. આ મુદ્દે શાસક વિપક્ષ સામસામે આવી ગયા હતા જેના કારણે પાલિકાનો સિક્યુરીટી સ્ટાફ દોડી ગયો હતો.
જોકે, આ મુદ્દે ભારે હોબાળો થયો હતો અને અનેક વખત સિક્યુરીટી સ્ટાફે દોડવું પડ્યું હતું. મેયર હાજર ન હોય આજે મેયર તરીકે ડાયસ પર ડેપ્યુટી મેયર નરેન્દ્ર પાટીલ હતા તેઓએ અધ્યક્ષ સ્થાનેથી વિપક્ષને સભા ચલાવવા દેવા માટે માફી માંગવા જણાવ્યું હતું. તો બીજી તરફ વિપક્ષે ભુલ નથી તો માફી માંગવાનો સવાલ નથી તેવું કહ્યું હતું. આ હોબાળો માં મહેશ અણઘડ અને રચના હીરપરાને વારંવાર બેસી જવા માટે સુચના આપી હતી તેમ છતાં સુચનાનો અમલ ન થતાં તેમને સસ્પેન્ડ કરી દેવામાં આવ્યા હતા. જેની સામે વિપક્ષે નારાજગી વ્યક્ત કરી હતી.
