Rahul Gandhi Makes Imarti and Laddu: દિવાળીના તહેવારે એટલે કે આજે કોંગ્રેસ નેતા રાહુલ ગાંધીએ જૂની દિલ્હીની પ્રખ્યાત ઘંટેવાલા મીઠાઈની દુકાનમાં ‘ઇમરતી’ અને ‘બેસનના લાડુ’ બનાવતા હોય તેવો એક વીડિયો શેર કર્યો. તેમણે લોકોને દિવાળીની શુભેચ્છા પાઠવી અને પૂછ્યું કે તેઓ આ તહેવારને કેવી રીતે ખાસ બનાવી રહ્યા છે.
દિવાળી પર રાહુલ ગાંધીએ ઈમરતી અને લાડુ બનાવ્યા
લોકસભાના વિરોધ પક્ષના નેતા રાહુલ ગાંધીએ સોશિયલ મીડિયા X પર આ વીડિયો પોસ્ટ કર્યો અને લખ્યું, ‘જૂની દિલ્હીની પ્રખ્યાત અને ઐતિહાસિક ઘંટેવાલા મીઠાઈની દુકાનમાં ઇમરતી અને બેસનના લાડુ બનાવવાનો પ્રયાસ કર્યો. સદીઓ જૂની આ પ્રતિષ્ઠિત દુકાનની મીઠાશ હજુ પણ એવી જ છે… શુદ્ધ, પરંપરાગત અને હૃદયસ્પર્શી. દિવાળીની સાચી મીઠાશ ફક્ત થાળીમાં જ નહીં, પણ સંબંધો અને સમાજમાં પણ છે. મને કહેજો કે તમે તમારી દિવાળી કેવી રીતે ઉજવી રહ્યા છો અને તમે તેને કેવી રીતે ખાસ બનાવી રહ્યા છો?’
X પર બીજી એક પોસ્ટમાં, રાહુલ ગાંધીએ દિવાળીના શુભ અવસર પર દેશવાસીઓને શુભેચ્છાઓ પાઠવતા લખ્યું કે, ‘ભારત ખુશીના પ્રકાશથી પ્રકાશિત થાય, દરેક ઘરમાં આનંદ, સમૃદ્ધિ અને પ્રેમનો પ્રકાશ ફેલાય.’
આ પણ વાંચો: ઓલા કંપનીના એન્જિનિયરે જીવન ટૂંકાવ્યું, સુસાઈડ નોટના આધારે ફાઉન્ડર વિરૂદ્ધ FIR
દુકાનદારે રાહુલ ગાંધીને લગ્ન કરવા માટે અપીલ કરી
વીડિયોમાં, દુકાન માલિકે રાહુલ ગાંધીને કહ્યું કે, ‘મેં તમારા દાદી, પિતા અને પરિવારના અન્ય સભ્યોને મીઠાઈ પીરસી હતી, જલ્દી લગ્ન કરી લો તેથી હું તમારા લગ્નમાં પણ મીઠાઈ પીરસી શકું. આ સાંભળીને રાહુલ ગાંધી ફક્ત સ્મિત કરે છે.
