Jamnagar Liquor Crime : જામનગર જિલ્લાના ધ્રોલ તાલુકાના ખાખરા ગામ પાસે એક કારમાં લઈ જવાતો ઇંગ્લિશ દારૂનો જથ્થો પોલીસે પકડી પાડ્યો છે, અને રૂપિયા સાડા ચાર લાખની માલમતા સાથે જામનગરના એક દારૂના ધંધાર્થીની અટકાયત કરી છે. જ્યારે દારૂ મંગાવનાર ખાખરા ગામના એક શખ્સને ફરાર જાહેર કરાયો છે.
જામનગરની લોકલ ક્રાઈમ બ્રાન્ચની ટીમને ચોક્કસ બાતમી મળી હતી, કે જામનગરના રામેશ્વર નગર વિસ્તારમાં રહેતા રવિરાજસિંહ દાદુભા ચૌહાણ નામના શખ્સ દ્વારા ઇંગ્લિશ દારૂની હેરાફેરી કરવામાં આવી રહી છે, અને એક કારમાં ઈંગ્લીશ દારૂનો જથ્થો ભરીને ધ્રોળ તાલુકાના ખાખરા ગામે સપ્લાય કરવા જઈ રહ્યો છે.
જે બાતમીના આધારે ખાખરા ગામ પાસેથી રવિરાજસિંહ ચૌહાણને પોલીસે ઝડપી લીધો હતો, અને તેની પાસેથી 113 નંગ ઇંગ્લિશ દારૂની બાટલી તેમ જ જી.જે.12 ડી.જી. 7160 નંબરની કાર સહિત રૂપિયા સાડા ચાર લાખની માલમતા કબજે કરી છે. પોલીસની પૂછપરછ દરમિયાન ધ્રોળ તાલુકાના ખાખરા ગામમાં રહેતા મફતસિંહ ઉર્ફે જયપાલસિંહ બળુભા જાડેજાએ ઉપરોક્ત દારૂ આયાત કર્યો હોવાથી પોલીસે તેને ફરાર જાહેર કરી શોધખોળ હાથ ધરી છે.
