– ટ્રાફિકની કામગીરી વખતની ઘટના
– બંનેને ઈજા કરી ચાલક ગાડી લઈ ફરાર : પીછો કર્યા બાદ મૂળીનો કાર ચાલક અંતે ઝડપાયો
ધ્રાંગધ્રા : ધ્રાંગધ્રા શહેરી વિસ્તારમાં ટ્રાફિકની કામગીરી કરતા પોલીસ કર્મચારી અને હોમગાર્ડ જવાન પર બોલેરો કારના ચાલકે હત્યાનો પ્રયાસ કરવાની ફરિયાદ નોંધાવતા પોલીસે વધુ તપાસ હાથ ધરી છે.
ધ્રાંગધ્રા સિટી પોલીસ મથકના પોલીસ કર્મચારી મહેન્દ્રસિંહ કરસનભાઈ સોલંકી તથા હોમગાર્ડ જવાન રાજદીપસિંહ ઝાલા બંને કર્મચારીઓ શનિવારે મોડી સાંજે ધ્રાંગધ્રા શહેરના નરસિંહપરા વિસ્તારમાં ટ્રાફિક અંગેની કામગીરી કરી રહ્યા હતા. દરમિયાન રોકડિયા સર્કલ તરફથી બોલેરો કાર પુરઝડપે નીકળતા કારને અટકાવવાનો પ્રયાસ કરતા કાર ચાલકે પૂર ઝડપે પોલીસ કર્મચારી અને હોમગાર્ડ જવાન પર કાર ચડાવી દેવાનો પ્રયાસ કર્યો હતો. આ ઘટનામાં પોલીસ કર્મચારી તથા હોમગાર્ડ જવાનને ઇજાઓ પહોંચી હતી. ઈજા પહોંચાડી નાશી છુટેલા કાર ચાલકનો પીછો કરી ઝડપી લીધો હતો. વધુ પૂછપરછ કરતા કાર ચાલકનું નામ મેહુલભાઈ હીરાભાઈ ખરગીયા રહે. મૂળીવાળાને કાર સાથે ઝડપી પાડી સીટી પોલીસ મથકે હત્યાના પ્રયાસ અંગેનો ગુનો નોંધી કાર્યવાહી હાથ ધરી હતી.
અત્રે ઉલ્લેખનીય છે કે, સુરેન્દ્રનગર જિલ્લામાં બેફામ દોડતા કાર ચાલકોથી લોકો ત્રાહિમામ પોકારી ઉઠયા છે. ત્યારે પોલીસ દ્વારા આવા કાર ચાલકને ઝડપી પાડી કાયદાનો પાઠ ભણાવવામાં આવે તેવી માંગ ઉઠવા પામી છે.
