રાજકોટના યુનિવર્સિટી રોડ પરની ઘટના
ધો. 8માં અભ્યાસ કરતી લાડલી અને એકલૌતી પુત્રીના મોતથી પરિવારના સભ્યો હચમચી ગયા, મહિલા કારચાલક સામે કડક કાર્યવાહીની માંગ
રાજકોટ: શહેરમાં બેફામ સ્પીડથી વાહનો ચલાવનારાઓને અટકાવવામાં ટ્રાફિક પોલીસ સદંતર નિષ્ફળ નીવડી છે. જેને કારણે આવા વાહનચાલકો છાશવારે અકસ્માતો અને પ્રાણઘાતક અકસ્માતો સર્જે છે. યુનિવર્સિટી રોડ પર એચ.પી. પેટ્રોલ પંપની સામે બે દિવસ પહેલા એક્ટિવા પર જતી માતા-પુત્રીને પાછળથી પૂરપાટ વેગે કાર લઇ ધસી આવેલી મહિલાએ હડફેટે લેતાં બંનેને ગંભીર ઇજા થઇ હતી. જેમાંથી જીવન-મરણ વચ્ચે ઝોલા ખાતી પુત્રીનું આજે મોત નીપજતાં પરિવારમાં કલ્પાંત મચી ગયો છે.
પ્રહલાદ પ્લોટમાં રહેતાં દેવાંગભાઇ કોટેચા જગદીશ મંડપ સર્વિસ નામની પેઢી ચલાવે છે. તેને સંતાનમાં એક પુત્રી ધુ્રવી (ઉ.વ.૧૫) હતી. જે એસએનકેમાં ધો. ૮માં અભ્યાસ કરતી હતી. દેવાંગભાઈના પત્ની દર્શનાબેનના રૈયા રોડ પર રહેતા ફઇબા નયનાબેન પૂજારાને ત્યાં ભાઈબીજને અનુલક્ષીને જમણવારનો કાર્યક્રમ રાખવામાં આવ્યો હતો. જેમાં હાજરી આપવા માટે દર્શનાબેન પુત્રી ધુ્રવીને લેવા ગઇ તા. ૭ના રોજ બપોરે સ્કૂલે ગયા હતાં.
સ્કૂલેથી પુત્રીને એક્ટિવા પાછળ બેસાડી રૈયા રોડ તરફ એકદમ ધીમી સ્પીડથી જતા હતા ત્યારે યુનિવર્સિટી રોડ પર આવેલ એચપીસીના પેટ્રોલ પંપ પાસેના સિગ્નલે પાછળથી પૂરપાટ વેગે ધસી આવેલી હોન્ડા સિટી કારે તેમના એક્ટિવાને હડફેટે લેતા બંને રોડ પર માથાભેર પટકાઇ ગઇ હતી. ગંભીર ઇજા થતા બંનેને ખાનગી હોસ્પિટલમાં ખસેડાઇ હતી.જ્યાં આજે બપોરે ધુ્રવીએ દમ તોડી દીધો હતો.
અકસ્માત સર્જનાર કાર મહિલા ચલાવતી હતી. ગઇકાલે ગાંધીગ્રામ-૨ પોલીસે દર્શનાબેનની ફરિયાદના આધારે ગુનો દાખલ કર્યો હતો. કાર નંબર પણ દર્શનાબેને જ પોલીસને આપ્યા હતા. જેના આધારે પોલીસ સુત્રોએ જણાવ્યું કે કાર ચાલક કૃતિકાબેન ધવલભાઇ શેઠ સાધુ વાસવાણી રોડ પરના આદિત્ય હાઇટ્સમાં રહે છે. તેની પાસે હોન્ડા સિટી કાર હતી. જે કબજે લેવામાં આવી છે. બીજી તરફ એકલૌતી પુત્રીના મોતથી પરિવારના સભ્યો હચમચી ગયા છે. તેમણે શહેરમાં આ રીતે બેફામ સ્પીડ અને બેદરકારીથી વાહન ચલાવનારાઓ સામે કડક કાર્યવાહી કરવાની માગણી કરી છે.
આ અકસ્માતનો વીડિયો પણ વાયરલ થયો છે. જેમાં અકસ્માત સર્જનાર કાર ફૂલ સ્પીડમાં હોવાનું સ્પષ્ટપણે દેખાય છે. કારની ટક્કરથી માતા-પુત્રી રોડ પર ફૂટબોલની જેમ ફંગોળાયાના દ્રશ્યો અરેરાટી સર્જે તેવા છે.
– માસુમ ધુ્રવી માતાથી સાત ફૂટ દૂર પટકાઇ લોહીલુહાણ બની ગઇ હતી
રાજકોટ: અકસ્માતમાં ઘાયલ દર્શનાબેનને ગંભીર ઇજા પહોંચી હતી. તેના બંને હાથ, બંને પાંસળી અને શરીરના અન્ય ભાગમાં ફ્રેકચર થઇ ગયું હતું. જ્યારે આજે જેનું મોત થયું હતું તે ધુ્રવીના માથામાં અને શરીર પર ગંભીર ઇજાઓ પહોંચી હતી. અકસ્માત બાદ ધુ્રવી માતાથી અંદાજે સાતેક ફૂટ દૂર જઇ પડી હતી. તેના માથામાંથી લોહી નીકળવા લાગ્યું હતું. અકસ્માત બાદ તે સંપૂર્ણપણે બેભાન અવસ્થામાં જ હતી. આમ તો ધુ્રવી દરરોજ સ્કૂલ બસમાં અવરજવર કરતી. પરંતુ પ્રસંગ હોવાથી તેની માતા તેને તેડવા સ્કૂલે ગયા હતા.
– રાજકોટમાં બેફામ સ્પીડથી વાહન ચલાવનારાઓનો ત્રાસ
રાજકોટ: શહેરમાં માત્ર દંડ વસૂલીમાં જ રચીપચી રહેતી ટ્રાફિક પોલીસ બેફામ અને માતેલા સાંઢની જેમ દોડતા વાહનોના ચાલકો સામે કાર્યવાહી કરવામાં નિષ્ફળ ગઇ છે. આ કિસ્સામાં પણ મહિલા ફૂલ સ્પીડથી કાર ચલાવતા હોવાનો આક્ષેપ થયો છે. આ સ્થિતિમાં ટ્રાફિક પોલીસ શહેરમાં બેફામ સ્પીડથી દોડતાં વાહનચાલકો સામે ગંભીરતા દાખવી કાર્યવાહી કરે તેવી માંગ ઉઠી છે.
