Animal Cruelty in Chhota Udepur: છોટાઉદેપુર જિલ્લાના બોડેલીમાં છેલ્લા બે દિવસથી અમાનવીય કૃત્યની ઘટનાઓ સામે આવતાં લોકોમાં ભારે રોષ ફેલાયો છે. કોઈ અજાણ્યા ઈસમ દ્વારા ધારદાર હથિયાર વડે 8 જેટલી ગાયોને નિશાન બનાવી ગંભીર રીતે ઘાયલ કરવામાં આવી છે.
ગાયોના પેટના ભાગે 5-6 ઈંચના ઘા
મળતી માહિતી અનુસાર, બોડેલીમાં અજાણ્યા શખસે જે રીતે ગાયોને નિશાન બનાવી છે, તે ખૂબ જ ક્રૂરતાભર્યું છે. રોડ ઉપર રખડતી આઠ જેટલી ગાયોને ધારદાર હથિયાર વડે તેમના પેટના ભાગે 5થી 6 ઈંચનો ઊંડો ઘા મારીને ઈજાગ્રસ્ત કરવામાં આવી હતી. આ ઘટનાની જાણ બોડેલી પોલીસને થતાં પોલીસે તાત્કાલિક ઈજાગ્રસ્ત ગાયોને શોધીને પશુ ચિકિત્સક પાસે સારવાર માટે મોકલી હતી.
આરોપીને શોધવા પોલીસની ટીમો મેદાનમાં
આ ઘટનાને પગલે બોડેલી પોલીસે ગાયોને ઘાયલ કરનારા આવા તત્વોને શોધી કાઢવા માટે સઘન તપાસ શરૂ કરી છે. પોલીસે આરોપીને ઝડપી પાડવા માટે અલગ અલગ ટીમો બનાવી છે. આ ઉપરાંત બોડેલીમાં તમામ જગ્યાના સીસીટીવી ફૂટેજ ચેક કરવામાં આવી રહ્યા છે અને આવા કૃત્ય કરતા ઇસમને પકડવા માટે વિસ્તારમાં કડક વોચ ગોઠવી દેવામાં આવી છે.
સ્થાનિક લોકોમાં આ અમાનવીય ઘટના પ્રત્યે ભારે રોષ જોવા મળી રહ્યો છે. લોકો આવા ક્રૂર તત્ત્વોને વહેલી તકે શોધી કાઢી જેલના સળિયા પાછળ ધકેલી દેવા માટે પોલીસ સમક્ષ માંગ કરી રહ્યાં છે.
