Rahul Gandhi Vs Election Commission: 16 પૂર્વ જજ, 123 નિવૃત્ત અમલદારો (જેમાં 14 પૂર્વ રાજદૂત પણ સામેલ છે) અને 133 નિવૃત્ત સૈન્ય અધિકારીઓ સહિત દેશના 272 પ્રતિષ્ઠિત નાગરિકોએ એક પત્ર જાહેર કર્યો છે. આ પત્રમાં વિપક્ષના નેતા રાહુલ ગાંધી અને કોંગ્રેસ પાર્ટી પર બંધારણીય સંસ્થાઓને નિશાન બનાવવાનો આરોપ મૂકવામાં આવ્યો છે અને તેમની આકરા શબ્દોમાં નિંદા કરી છે.
બંધારણીય સંસ્થાઓને નિશાન બનાવવાનો આરોપ
પત્રમાં એવો આરોપ મૂકવામાં આવ્યો છે કે, ‘સૈન્ય દળો, ન્યાયપાલિકા અને સંસદ પર સવાલો ઉઠાવ્યા પછી, હવે ચૂંટણી પંચ(ECI)ને નિશાન બનાવવામાં આવી રહ્યું છે. વરિષ્ઠ નાગરિકોએ લખ્યું કે, વિપક્ષના નેતા રાહુલ ગાંધીએ વારંવાર ECI પર વોટ ચોરીમાં સામેલ થવાનો આરોપ લગાવ્યો છે. તેમણે ‘પરમાણુ બોમ્બ’ જેવી ભાષા વાપરી અને અહીં સુધી કહ્યું કે આયોગ દેશદ્રોહ કરી રહ્યું છે. જોકે, આ ગંભીર દાવાઓના સમર્થનમાં કોઈ ઔપચારિક ફરિયાદ કે શપથપત્ર રજૂ કરવામાં આવ્યું નથી.’
એક ક્રોધનું કારણ ચૂંટણીમાં થયેલી હાર
પત્ર મુજબ, પુરાવા વિનાના આ આરોપો એક ક્રોધનું સ્વરૂપ છે. આ ગુસ્સો વારંવારની ચૂંટણીમાં થયેલી હાર અને જનતાથી વધતા અંતરને કારણે ઉદ્ભવ્યો છે. પત્રમાં વધુમાં કહેવાયું છે કે, ‘કેટલાક રાજકીય પક્ષો વિશ્લેષણના સ્થાને નાટકીયતાને પ્રાધાન્ય આપી રહ્યા છે અને જાહેર સેવાને બદલે રાજકીય તમાશો કરી રહ્યા છે.
પ્રતિકૂળ પરિણામોમાં જ ECI ખલનાયક!
દેશની આ પ્રતિષ્ઠિત હસ્તીઓએ પત્રમાં લખ્યું કે, ‘જ્યારે વિપક્ષ શાસિત રાજ્યમાં ચૂંટણી પંચના પરિણામો વિપક્ષની તરફેણમાં આવે છે, ત્યારે તેની આલોચના થતી નથી. જોકે, જ્યારે પરિણામો તેમની વિરુદ્ધ આવે છે, ત્યારે આયોગને દરેક કથાનો ખલનાયક બનાવી દેવામાં આવે છે. આ નાગરિકોને તેમની આ પસંદગીયુક્ત નારાજગી, રાજકીય તકવાદના ઉદાહરણ સમાન લાગી.’
આ પણ વાંચો: ખુશીઓ માતમમાં ફેરવાઈ, ડીજે પર નાચતા યુવકે પિસ્તોલ લહેરાવી ફાયરિંગ કરતાં બાળકીનું મોત
નિષ્પક્ષતા અને સખતાઈ પર ભાર
આ પત્રમાં, ટી.એન. શેષન અને એન. ગોપાલસ્વામી જેવા પૂર્વ મુખ્ય ચૂંટણી કમિશનરોનો ઉલ્લેખ કરવામાં આવ્યો છે. પત્રમાં જણાવાયું છે કે, ‘તેમણે લોકપ્રિયતા કે હેડલાઇન્સની ચિંતા કર્યા વિના નિષ્પક્ષતા અને સખતાઈથી નિયમોનું પાલન કરાવ્યું હતું. વરિષ્ઠ નાગરિકોના મતે, ભારતની સંસ્થાઓને રાજકીય હુમલાઓનું નિશાન ન બનાવવી જોઈએ, કારણ કે આ જ પરંપરા દેશને મજબૂત બનાવે છે.’
ચૂંટણી પંચને પારદર્શિતા જાળવવાની અપીલ
વરિષ્ઠ નાગરિકોએ ચૂંટણી પંચ(ECI)ને વિનંતી કરી છે કે તેણે પારદર્શિતા જાળવી રાખવી, તમામ આંકડા જાહેર કરવા અને જરૂર જણાય તો કાનૂની માધ્યમો દ્વારા પોતાનો બચાવ કરવો જોઈએ. તે જ સમયે, રાજકીય પક્ષોને પણ આગ્રહ કરવામાં આવ્યો છે કે તેઓ ‘પુરાવા વિનાના આરોપો’ લગાવવાનું છોડીને નીતિગત વિકલ્પો અને દેશ માટે એક નક્કર દ્રષ્ટિકોણ રજૂ કરે.
આ પત્રના સમાપનમાં, દેશની વરિષ્ઠ હસ્તીઓએ ભારતીય સેના, ન્યાયપાલિકા, કાર્યપાલિકા અને વિશેષ રૂપે ચૂંટણી પંચમાં પોતાનો અતૂટ વિશ્વાસ વ્યક્ત કર્યો છે. તેમણે એવું પણ જણાવ્યું કે ભારતનું લોકતંત્ર મજબૂત છે. હવે સમયની માંગ છે કે રાજકારણ નાટકીયતાને છોડીને સત્ય, વિચાર અને સેવાના આધારે આગળ વધે.
