ભારતનો સાઉથ આફ્રિકા સામેની પ્રથમ વન ડેમાં 17 રનથી રોમાંચક વિજય
તેંડુલકરે ટેસ્ટમાં 51 સદી ફટકારી હતી : કોહલીની આંતરરાષ્ટ્રીય ક્રિકેટમાં ૮૩મી સદી : ૩૫૦ના ટાર્ગેટ સામે સાઉથ આફ્રિકા ૩૩૨ રનમાં ખખડયું
રાંચી: વિરાટ કોહલીએ વન ડેમાં વર્લ્ડ રેકોર્ડ ૫૨મી સદી ફટકારીને ઈતિહાસ રચી દીધો હતો. સાઉથ આફ્રિકા સામેની વન ડેમાં કોહલીએ સાત છગ્ગા અને ૧૧ ચોગ્ગા સાથે ૧૩૫ રન ફટકારતાં સનસનાટી મચાવી હતી. આ સાથે તેણે ક્રિકેટના કોઈ એક ફોર્મેટમાં સૌથી વધુ ૫૧ સદીના તેંડુલકરના વર્લ્ડ રેકોર્ડને તોડી નાંખ્યો હતો. તેંડુલકરે ટેસ્ટમાં ૫૧ સદી ફટકારી હતી.
કોહલીની ઝંઝાવાતી વિક્રમી સદી તેમજ રાહુલના ૬૦ અને રોહિતના ૫૭ રનની મદદથી ભારતે રાંચીમાં રમાયેલી પ્રથમ વન ડેમાં ૩૪૯/૮નો સ્કોર ખડક્યો હતો. કુલદીપે ચાર અને હર્ષિતે ત્રણ વિકેટ ઝડપતાં સાઉથ આફ્રિકા ૪૯.૨ ઓવરમાં ૩૩૨ રનમાં ઓલઆઉટ થતાં ૧૭ રનથી હારી ગયું હતુ.
ધોનીના હોમટાઉન રાંચીમાં કોહલીની વિસ્ફોટક બેટિંગે ભારતની જીતનો પાયો નાંખ્યો હતો. આ સાથે તેણે આંતરરાષ્ટ્રીય ક્રિકેટમાં કુલ ૮૩મી સદી પુરી કરી હતી. તેંડુલકર આંતરરાષ્ટ્રીય ક્રિકેટમાં સૌથી વધુ ૧૦૦ સદીનો વર્લ્ડ રેકોર્ડ ધરાવે છે. ક્રિકેટના ભગવાન તરીકેની ઓળખ ધરાવતા માસ્ટર-બ્લાસ્ટરે ટેસ્ટમાં ૫૧ અને વન ડેમાં ૪૯ સદી ફટકારી છે. જ્યારે કોહલીએ વન ડેમાં ૫૨, ટેસ્ટમાં ૩૦ અને ટી-૨૦માં એક સદી નોંધાવી છે. આંતરરાષ્ટ્રીય ક્રિકેટમાં સૌથી વધુ સદી ફટકારવાના વર્લ્ડ રેકોર્ડમાં તેંડુલકર અને કોહલી ટોચના બે સ્થાન ધરાવે છે.
ભારતના વિસ્ફોટક બેટસમેન કોહલીએ આ સાથે ઘરઆંગણે વન ડેમાં ૫૯મી વખત ૫૦ કે તેથી વધુનો સ્કોર કર્યો હતો અને તેંડુલકરનો રેકોર્ડ તોડી નાંખ્યો હતો. તેંડુલકરે ઘરઆંગણે વન ડેમાં ૫૮ વખત ૫૦ કે વધુનો સ્કોર કર્યો હતો.
