Supreme Court On Waqf: સુપ્રીમ કોર્ટે વક્ફની સંપત્તિઓની વિગતો ‘UMEED’ પોર્ટલ પર અપલોડ કરવાની સમયમર્યાદા લંબાવવાની અરજીઓ પર સ્પષ્ટપણે ઇન્કાર કરી દીધો છે. આ અરજીઓમાં ઓલ ઇન્ડિયા મુસ્લિમ પર્સનલ લો બોર્ડ (AIMPLB) અને AIMIM નેતા અસદુદ્દીન ઓવૈસીની અરજીઓનો પણ સમાવેશ થતો હતો.
અરજદારોને આપ્યો આ નિર્દેશ
કોર્ટે અરજદારોને નિર્દેશ આપ્યો છે કે તેઓ આ મુદ્દે સંબંધિત ટ્રિબ્યુનલમાં જઈને પોતાનો પક્ષ રજૂ કરે. વક્ફ સંપત્તિઓની વિગતો પોર્ટલ પર અપલોડ કરવાની છેલ્લી તારીખ 5 ડિસેમ્બર સુધીની જ રાખવામાં આવી છે. જો આ સમયમર્યાદામાં વિગતો અપલોડ કરવામાં નહીં આવે, તો સંબંધિત વ્યક્તિ કે સંસ્થાને દંડ અને સજા થઈ શકે છે.
નિયમ શું કહે છે?
નિયમો અનુસાર, વક્ફ સંપત્તિની વિગતો અપલોડ કરવામાં નિષ્ફળ રહેનારને છ મહિનાની જેલ અને 20,000 રૂપિયા સુધીનો દંડ થઈ શકે છે. ઉપરાંત, જે લોકો તેમની સંપત્તિ પોર્ટલ પર રજિસ્ટર નહીં કરાવે, તેમની સંપત્તિનો વક્ફ દરજ્જો સમાપ્ત કરી દેવામાં આવશે અને તે પછી માત્ર વક્ફ ટ્રિબ્યુનલના આદેશથી જ તેનું પુનઃનોંધણી કરાવી શકાશે. આ પહેલાં 15 સપ્ટેમ્બરના રોજ સુપ્રીમ કોર્ટે વક્ફ (સંશોધન) અધિનિયમ 2025ને સંપૂર્ણપણે સ્થગિત કરવાનો ઇન્કાર કર્યો હતો, જોકે કેટલીક જોગવાઈઓ પર રોક લગાવી હતી.
