– સવારના સમયે સમીપ કોમ્પ્લેક્સના પાર્કિંગમાં કચરામાં લાગેલી આગે વિકરાળ સ્વરૂપ ધારણ કર્યું
– આગની ઘટનાને પગલે ભારે અફરાતરફરી, 5 ફાયર ફાયટરે, 60 કર્મીઓએ 3 કલાકની જહેમત બાદ કાબુ મેળવ્યો
ભાવનગર : શહેરના કાળુભા રોડ પર આવેલા સમીપ કોમ્પલેક્સના બેઝમેન્ટમાં આજે સવારના સમયે કચરાના ઢગલામાં આગ ભભુકી ઉઠી હતી. જે આગે જોતજોતામાં વિકરાળ સ્વરૂપ ધારણ કરી લીધું હતું અને કોમ્પ્લેક્સમાં આવેલી હોસ્પિટલ અને લેબોરેટરીને આગની લપેટમાં લઈ લીધી હતી. આ ઘટનાને લઈ અફરા-તફરીનો માહોલ સર્જાયો હતો. આગ લાગ્યાંનો સંદેશો મળતા ફાયર સ્ટાફની ટીમે ત્વરિત કામગીરી કરી બાળકો સહિત ૧૯ જેટલા લોકોને લેડરની મદદ વડે રસક્યું કર્યાં હતા અને ભારે જહેમત બાદ આગ પર કાબુ મેળવ્યો હતો. સદ્નસીબે ભાવનગરમાં મોટી દુર્ઘટના થતાં ટળી હતી.
શહેરના કાળુભા રોડ પર આવેલા હોસ્પિટલ અને લેબોરેટરી ધરાવતા સમીપ કોમ્પ્લેક્સના પાર્કિંગમાં રહેલા કચરાના ઢગલામાં આજે સવારના સમયે આગ ભભુકી ઉઠી હતી. જે આગે જોતજોતામાં વિકરાળ સ્વરૂપધારણ કરી લઈ કોમ્પ્લેક્સમાં આવેલી હોસ્પિટલ અને લેબોરેટરીને ચપેટમાં લઈ લીધી હતી. ધુમાડાના ગોટેગોટા જોઈ હોસ્પિટલમાં આવેલા દર્દીઓ અને તેમના સગાઓ તથા અન્ય લોકોમાં ભારે અફરાતફરીનો માહોલ સર્જાયો હતો. બનાવને લઈને શહેરમાં દુર સુધી ધુમાડો જોવા મળ્યો હતો. આગના પગલે સ્થાનિકો દ્વારા આગને કાબુમાં લેવાનો પ્રયાસ કરવામાં આવ્યો હતો પરંતુ આગ વિકરાળ હોવાથી સ્થાનિકો દ્વારા ભાવનગર ફાયર સ્ટાફને સવારે ૯.૪૩ કલાકે જાણ કરતા ભાવનગર મહાનગરપાલિકાની ફાયરની હેડક્વાટરની એક ટીમ સ્થળ પર પહોંચી ગયા બાદ ઝોનલ ઓફિસોની વધારાની ટીમો મળી કુલ પાંચ ફાયર ફાયટર અને ૬૦ ફાયર વિભાગના કર્મચારીઓએ સ્થળે પહોંચી આગને કાબુમાં લેવાના પ્રયાસો શરૂ કર્યાં હતા. ઉપરાંત કોમ્પ્લેક્સમાં હોસ્પિટલ હોય અને તેમાં એડમિટ દર્દીઓને અન્ય હોસ્પિટલમાં ટ્રાન્સફર કરવા માટે ૧૦૮ની એમ્બ્યુલન્સને પણ બોલાવવામાં આવી હતી. જેમના મારફત હોસ્પિટલના ત્રણેય માળે આવેલી જુદી-જુદી હોસ્પિટલોમાંથી કુલ ૦૭ નવજાત બાળકો, પાંચ અન્ય પુખ્તવયના દર્દીઓ મળી કુલ ૧૯ લોકોને રેસ્ક્યુ કરવામાં આવ્યા હતા. જેમાંથી પાંચ નવજાત બાળકો તથા પાંચ પુખ્ત વયના દર્દીઓને સર ટી. હોસ્પિટલમાં, જ્યારે અન્ય બે નવજાત બાળકોને ખાનગી હોસ્પિટલમાં ખસેડવામાં આવ્યા હતા. બીજી તરફ ભાવનગર મહાનગરપાલિકાની ફાયરની ટીમોએ કુલ ૧૮ હજાર લીટર પાણીનો છંટકાવ કરી ત્રણ કલાકની જહેમત બાદ આગ સંપૂર્ણ કાબુમાં લીધી હતી. સદ્નસીબે આ દુર્ઘટનામાં કોઈ મોટી જાનહાનિ નહી સર્જાતા તંત્રએ રાહતનો શ્વાસ લીધો હતો. આગના કારણે સમગ્ર કોમ્પ્લેક્સમાં ધુમાડો ફેલાયો હોવાથી કોમ્પ્લેક્સમાં રહેલા લોકોને ભારે ગુગળામણનો સામનો કરવો પડયો હતો. બીજી તરફ આ ઘટનામાં કોમ્પ્લેક્સમાં પાર્ક થયેલા ૧૨ મોટરસાયકલ, ૨ કાર પણ આગની ચપેટમાં આવી ગઈ હતી. સવારના સમયે બનેલો આગનો બનાવ ટોક ઓફ ધી ટાઉન બન્યો હતો અને સોશિયલ મીડિયામાં ઘટનાના વીડિયો અને ફોટો વાયરલ થયાં હતા. ચીફ ફાયર ઓફિસના જણાવ્યા અનુસાર કોમ્પ્લેક્સની બાંધકામ મંજુરી અને બીયુ પરમિશન હોવાનું તથા ફાયર એનઓસી અને ફાયર સિસ્ટમ કાર્યરત હતી.
ફાયર વિભાગે લોકોને નિસરણીથી રેસ્ક્યુ કરાયા
કાળુભા રોડ પર આવેલા સમીપ કોમ્પ્લેક્સમાં ભીષણ આગ ભભુકી ઉઠી હતી. આગ લાગવાની ઘટનાનો કોલ ફાયર બ્રિગેડને મળતા ફાયર ટીમ ત્વરિત દોડી આવી હતી અને આગ બુઝાવવાની અને આગમાં ફસાયેલા લોકોને નિસરણીની મદદ વડે રેસ્ક્યુ કરવાની કામગીરી કરી હતી. ફાયર સ્ટાફે નિસરણીથી નવજાત શિશુઓ સહિત ૧૯ લોકોને રેસ્ક્યૂ કર્યાં હતા.
ક્યાં કારણસર આગ લાગી તેની તપાસ કરશેઃકમિશનર
ભાવનગર શહેરના સમીપ કોમ્પ્લેક્સમાં આગ લાગી હોવાની જાણ થતાની સાથેજ કમિશનર એન.વી.મીના સહિતના પદાધિકારીઓ સ્થળ પર દોડી ગયા હતા.અને કમિશનરે જણાવ્યું હતું કે, કોમ્પલેક્સના બેઝમેન્ટમાં પડેલા કચરામાં આગ લાગી હતી, એના ધુમાડાથી હોસ્પિટલના દર્દીઓને અસર થતાં તેમને અન્ય જગ્યાએ ખસેડાયા હતા. આગને લઈ કોઈ જાનહાનિ થઈ નથી. ક્યાં કારણસર આગ લાગી હતી તેની યોગ્ય તપાસ કરી પગલાં લેવામાં આવશે.
બિલ્ડિંગમાં ફસાયેલ નસગ સ્ટાફ અંદરથી કાચની બારીને ઠપકારી બચાવોની બૂમો પાડતો હતો
કાળુભા રોડ પર આવેલ બિલ્ડિંગમાં ભયાવહ ભભૂકી ઊઠેલી આગમાં ફસાયેલ નસગ સ્ટાફ અંદરથી કાચની બારીને ઠપકારી ખોલો અને બચાવોની બૂમો પાડતો હતો. કોમ્પલેક્સની બારીના કાચ તોડી પાંચ જેટલા બાળકો અને નસગ સ્ટાફને રેસ્કયૂ કરવામાં આવ્યા હતા.
