જૂનાગઢ કંટ્રોલ રૂમમાં ફોન આવતાં પોલીસ ધંધે લાગી : પોલીસ બોમ્બ સ્ક્વોડ, ડોગ સ્ક્વોડ સાથે પોદાર સ્કૂલ પર પહોંચી પણ કંઈ ન મળ્યું : પતિએ બદનામી માટે ફોન કર્યાનો શિક્ષિકાનો ખુલાસો
જૂનાગઢ, : જૂનાગઢ પોલીસ કંટ્રોલ રૂમમાં આજે બપોરે અજાણ્યા શખ્સે ‘સુખપુર નજીક આવેલી પોદાર સ્કૂલની શિક્ષિકા વિદ્યાર્થીઓને નુકસાન થાય તેવો પદાર્થ લઈ આવી છે, 2 વાગ્યા સુધીમાં બાળકોને બચાવી લેજો’ એવો ફોન કર્યો હતો. પોલીસ તપાસમાં ત્યાંથી કોઈ વાંધાજનક વસ્તુ મળી ન હતી અને શિક્ષિકાના ઘરેલુ ઝગડામાં સ્ટાફ, વિદ્યાર્થીઓ, વાલીઓના જીવ ઉચ્ચક કરી દેવાયાનું ખુલ્યું હતું.
આજે બપોરે 12 વાગ્યા આસપાસ પોલીસ કંટ્રોલ રૂમમાં અજાણ્યા શખ્સે ફોન કર્યો હતો. જેમાં તેણે જૂનાગઢના વડાલ રોડ પર આવેલી પોદાર સ્કૂલમાં શિક્ષીકા તરીકે ફરજ બજાવતા નેહા મહેતા બાળકોને નુકસાન થાય તેવો પદાર્થ લઈ શાળાએ આવી છે, 2 વાગ્યા સુધીનો સમય છે બાળકોને બચાવી લેજો તેમ કહ્યું હતું. આ મેસેજ મળતા એસપીએ એલસીબી, એસઓજી, બોમ્બ સ્ક્વોડ, ડોગ સ્ક્વોડ અને ફાયર બ્રિગેડને જાણ કરી તાત્કાલિક પોદાર સ્કૂલ ખાતે પહોંચવા હુકમ કર્યો હતો. પોલીસે પોદાર સ્કૂલ ખાતે પહોંચી બાળકોને ક્લાસ રૂમમાંથી ગ્રાઉન્ડમાં ખસેડયા હતા. બાદમાં તપાસ કરતા શાળામાંથી કોઈ વાંધાજનક વસ્તુ મળી આવી ન હતી. શિક્ષિકાએ કહ્યું કે મહારાષ્ટ્ર રહેતા પતિએ પોતાને તથા સ્કૂલને બદનામ કરવા આ ફોન કર્યો હતો!
ડીવાયએસપીએ જણાવ્યું હતું કે, ખોટી રીતે ફોન કરી ભય ફેલાવવા તેમજ પોલીસને દોડાવવા બદલ રાજુ હેમારામ જાંગીર સામે ગુનો દાખલ કરવામાં આવ્યો છે અને તેને પકડવા એક ટીમ મહારાષ્ટ્ર રવાના થઈ છે.
