સગા-સંબંધીઓના બિભત્સ ફોટા વાયરલ કરવાની ધમકી આપી
ફરિયાદી પાસેથી રૂપિયા એક લાખ અને તેના મિત્રને પણ ફોટા વાયરલ કરવાની ધમકી આપી રૂ.બે લાખ માંગ્યા હતા
આણંદ: ખંભાતની એક જાણીતી શૈક્ષણિક સંસ્થાના ટ્રસ્ટી અને તેમના પરિવારના સભ્યો અને મિત્રના ફોટાઓ સાથેનું ન્યુઝ પેપરનું ખોટું કટીંગ બનાવી સોશિયલ મીડિયામાં વાયરલ કરી તેમજ મોર્ફ કરેલા બિભત્સ ફોટા એક કવરમાં પોસ્ટ મારફતે ટ્રસ્ટી તથા તેમના સંબંધીઓને મોકલી તેમજ વોટ્સએપ મારફતે ફોટા વાયરલ કરવામાં આવ્યા હતા. તેમજ ખંડણી માંગવામાં આવતા આણંદ સાયબર પોલીસ મથકે અજાણ્યા શખ્સો સામે ફરિયાદ નોંધાઈ હતી. જે મામલે પત્રકાર મનીષ મકવાણાની ધરપકડ કરવામાં આવી છે.
આણંદ સાયબર પોલીસ સ્ટેશનમાં નોંધાયેલી ફરિયાદ મુજબ, આ કારસ્તાનના અજાણ્યા આરોપીઓએ ફરિયાદીના પત્ની, દીકરી અને મિત્રના ફોટાઓ સાથે ન્યુઝ પેપરનું ખોટું કટીંગ બનાવી સોશિયલ મીડિયામાં ફોરવર્ડ કર્યું હતું. તેમજ ફરિયાદીની દીકરી તથા તેમના મિત્ર સાથેના મોર્ફ કરેલ બિભસ્ત ફોટા પોસ્ટ મારફતે ફરિયાદીના ઘર સરનામે અને ફરિયાદીના સગા સંબંધીઓના સરનામે પોસ્ટ કરી તેમ વોટ્સએપ મારફતે વાયરલ કર્યા હતા. તેમજ પત્રકાર મનીષ મકવાણાનાએ આ ફોટાઓ બાબતે ફરિયાદી પાસે રૂપિયા એક લાખ માંગી અને ફરિયાદીના મિત્રને વોટ્સએપથી મોકલી ફોન કરી ફોટા વાયરલ કરવાની ધમકી આપીને રૂપિયા બે લાખની ખંડણી માંગી હતી. જે મામલે આરોપી પત્રકાર મનીષ મકાવાણાની સાયબર ક્રાઈમ પોલીસ દ્વારા ધરપકડ કરવામાં આવી છે.
