અમદાવાદ,રવિવાર
અમદાવાદમાં ગુનાહિત પ્રવૃતિ સાથે સંકળાયેલા અસામાજીક તત્વો વિરૂદ્ધ કાર્યવાહી કરવા માટે પીસીબી (પ્રિવેન્શન ઓફ ક્રાઇમ બ્રાંચ) દ્વારા પાસા અને તડીપારની કાર્યવાહી કરવામાં આવે છે. અમદાવાદ પોલીસે ચાલુ વર્ષે ૧૦૦૬ જેટલા આરોપીઓ વિરૂદ્ધ પાસાની અને ૨૧૮ જેટલા આરોપીઓને તડીપાર કર્યા હતા. આરોપીઓ વિરૂદ્ધની આ કાર્યવાહી વર્ષ ૨૦૨૩ અને ૨૦૨૪ની સરખામણીમાં ૩૦ જેટલી વધારે છે. ત્યારે હજુ ડિસેમ્બર મહિના દરમિયાન હજુ અનેક અસામાજિક તત્વો વિરૂદ્ધ કાર્યવાહી કરાશે.
અમદાવાદમાં કાયદો અને વ્યવસ્થા જળવાઇ રહે તે માટે પોલીસ દ્વારા અટકાયતી પગલા ભરવાની મહત્વની કામગીરી કરવામાં આવે છે. જેમાં આરોપીની ૨૪ કલાક માટે ધરપકડ કરીને કાર્યવાહી કરવામાં આવે છે. આ ઉપરાંત, ગુનાહિત ઇતિહાસ ધરાવતા આરોપીઓ પર સતત હિલચાલ રાખવામાં આવે છે. પરંતુ, સતત ગુનાખારી આચરતા તત્વોને કાબુમાં કરવા માટે પોલીસ કમિશનરના સીધા માર્ગદર્શન હેઠળ કામ કરતી પીસીબી દ્વારા પણ દરોડા પાડીને ગુનો નોંધવા સુધીની કાર્યવાહી કરવામા ંઆવે છે. આ ઉપરાંત, અસામાજીક તત્વો વિરૂદ્ધ પાસા અને તડીપારની કાર્યવાહી કરવામા આવે છે.
પીસીબી દ્વારા વર્ષ ૨૦૨૪માં ૧૦૦૬ જેટલા આરોપીઓને પાસા હઠળ કાર્યવાહી કરીને રાજ્યની અલગ જેલમાં મોકલી આપવામા આવ્યાં હતા. જ્યારે હજુ ડિસેમ્બર મહિનો પૂર્ણ થતા આ આંકડો ૧૨૦૦ સુધી પહોંચવાની શક્યતા છે. આ વર્ષએ માર્ચમાં ૧૫૦ અને જુનમાં ૧૨૬ આરોપીની પાસા કરવામાં આવી હતી. વર્ષ ૨૦૨૩મા ૭૦૬ આરોપીઓને પાસા કરવામાં આવી હતી. જ્યારે વર્ષ ૨૦૨૪માં ૯૫૩ આરોપીઓને પાસાની સજા કરવામાં આવી હતી.
જ્યારે તડીપારની સજાની વાત કરીએ તો ૨૦૨૪માં ૩૦ નવેમ્બર સુધીમાં ૨૧૮ જેટલા અસામાજીક તત્વોને અમદાવાદથી અન્ય જિલ્લાઓમાં તડીપાર કરવામાં આવ્યા હતા. જેમાં જુન મહિનામાં ૫૨ આરોપીઓનો સમાવેશ થાય છે. જ્યારે વર્ષ ૨૦૨૩માં ૧૩૬ આરોપીઓ અને વર્ષ ૨૦૨૪માં ૧૫૨ અસામાજીક તત્વોને અમદાવાદ બહાર તડીપાર કરાયા હતા. પીસીબીએ પ્રોહીબીશન,ડ્ગ્સ અને શરીર સંબધિત ગુનાઓમાં સંડોવાયેલા વધુ અનેક આરોપીઓ વિરૂદ્ધ પાસા-તડીપારની કાર્યવાહી શરૂ કરી છે.
અમદાવાદ ક્રાઇમબ્રાંચ-પીસીબીએ શહેરમાં ૧૫થી વધુ દરોડા પાડીને દેશી-વિદેશી દારૂ જપ્ત કર્યો
અમદાવાદમાં પીસીબીએ છેલ્લાં ચાર દિવસ દરમિયાન દરિયાપુર, નારોલ, નિકોલ, સાબરમતી, ખોખરા, વટવા, કાગડાપીઠ, રીવરફ્રન્ટ ઇસ્ટ અને નરોડામાં દરોડા પાડીને વિદેશી દારૂની બે હજાર બોટલ અને ૮૩૩ લીટર દેશી દારૂ જપ્ત કરીને ૧૦થી વધુ આરોપીઓને ઝડપી લીધા હતા.આ ઉપરાંત, અમદાવાદ ક્રાઇમબ્રાંચે છથી વધુ ગુના નોંધીને વિદેશી અને દેશી દારૂ સાથે સાતથી વધુ આરોપીઓની ધરપકડ કરી છે. આમ, છેલ્લાં ચાર દિવસમાં શહેરમાં લાખો રૂપિયાનો દારૂ જપ્ત કરાયો છે.
