Animal Welfare Award: વન્યજીવન સંરક્ષણ અને પશુ કલ્યાણના ક્ષેત્રમાં ઉત્કૃષ્ટ કાર્ય બદલ યુનાઇટેડ સ્ટેટ્સ(US)માં આયોજિત એક આંતરરાષ્ટ્રીય પુરસ્કાર સમારોહમાં અનંત અંબાણીને ગ્લોબલ હ્યુમેનિટેરિયન એવોર્ડથી સન્માનિત કરવામાં આવ્યા હતા. આ સન્માન તેમને વનતારા દ્વારા પ્રાણીઓના બચાવ, સારવાર, પુનર્વસન અને સંરક્ષણમાં તેમના નેતૃત્વ માટે આપવામાં આવ્યું હતું.
આ સિદ્ધિ સાથે, અનંત અંબાણીએ એક ખાસ રેકોર્ડ પણ બનાવ્યો છે. તેઓ આ સન્માન મેળવનારા સૌથી યુવા અને પ્રથમ એશિયન વ્યક્તિ બન્યા છે. અગાઉ, આ પુરસ્કાર હોલિવૂડ સેલિબ્રિટીઓ અને અમેરિકન પ્રમુખ જૉન એફ કેનેડી અને બિલ ક્લિન્ટન સહિત અનેક વૈશ્વિક નેતાઓને આપવામાં આવ્યો છે. આ સન્માન સાથે ફરી એકવાર વનતારાનું કાર્ય વૈશ્વિક સ્તરે ચર્ચામાં આવ્યું છે. વનતારા આજે વિશ્વના સૌથી અનોખા અને સૌથી મોટા વન્યજીવન સંરક્ષણ પ્રોજેક્ટ્સમાં સામેલ છે. તે ઘાયલ, બીમાર અને લુપ્તપ્રાય પ્રાણીઓને નવું જીવન આપવા તેમજ લુપ્તપ્રાય પ્રજાતિઓને બચાવવા અને તેમને સુરક્ષિત વાતાવરણમાં પુનઃસ્થાપિત કરવા માટે સતત કાર્ય કરે છે.
સંરક્ષણ એ ભવિષ્યની બાબત નથી, પરંતુ આજની જવાબદારી છે: અનંત અંબાણી
એવોર્ડ સ્વીકારતા અનંત અંબાણીએ કહ્યું, ‘આ સન્માન મને ‘સર્વભૂત હિતા’ એટલે કે બધા જીવોનું કલ્યાણના માર્ગ પર વધુ મજબૂત રીતે આગળ વધવા માટે પ્રેરણા આપે છે. પ્રાણીઓ આપણને જીવનમાં સંતુલન અને સંવેદનશીલતા શીખવે છે. વનતારા દ્વારા અમારું લક્ષ્ય દરેક જીવને સન્માન, સંભાળ અને વધુ સારું જીવન પૂરું પાડવાનું છે. અમારા માટે સંરક્ષણ એ ભવિષ્યની બાબત નથી, પરંતુ આજની જવાબદારી છે.’
વનતારા વિશ્વ માટે એક ઉદાહરણ બની ગયું: ગ્લોબલ હ્યુમન સોસાયટી
આ કાર્યક્રમના આયોજક ‘ગ્લોબલ હ્યુમન સોસાયટી’એ અનંત અંબાણી અને વનતારાની પ્રશંસા કરતા કહ્યું કે ‘વનતારા ફક્ત એક રેસ્ક્યૂ સેન્ટર નથી, પરંતુ એક અનોખું મોડેલ છે જે પ્રાણીઓની સારવાર, સંભાળ અને સંરક્ષણને એકીકૃત કરે છે. વનતારાએ દર્શાવ્યું છે કે પ્રાણીઓને મોટા પાયે કેવી રીતે મદદ કરી શકાય છે અને આ મોડેલ હવે વિશ્વ માટે એક ઉદાહરણ બની ગયું છે.
આ આંતરરાષ્ટ્રીય કાર્યક્રમમાં વન્યજીવન સંરક્ષણ ક્ષેત્રે જોડાયેલી ઘણી અગ્રણી હસ્તીઓ હાજર હતી, જેમાં ડૉ. જૉન પૉલ રોડ્રીગેઝ, મેથ્યૂ જેમ્સ, વિલિયમ સ્ટ્રીટ, થૉમસ શ્મિટ, ડૉ. માઈકલ એડ્કેસન અને કેથલીન ડુડઝિન્સ્કીનો સમાવેશ થાય છે. ભારતમાંથી ડૉ. નીલમ ખૈરે, ડૉ. વી.બી. પ્રકાશ અને ડૉ. કે.કે. શર્મા પણ આ કાર્યક્રમમાં હાજર હતા.
