અમદાવાદ, સોમવાર
બેફામ વાહનો હંકારવાના કારણે હિટ એન્ડ રન તથા અકસ્માતમાં મોતના બનાવોમાં ચિંતાજનક વધારો થઇ રહ્યો છે. પૂર્વમાં હિટ એન્ડ રનના ત્રણ બનાવમાં ત્રણ યુવકનો મોત થયા છે. જેમાં નરોડા-દહેગામ રોડ ઉપર કોલેજ જઇ રહેલ વિધાર્થીની બાઇકને ટ્રેલર ચાલકે ટક્કર મારતા ટ્રેલરના ટાયર નીચે કચડાતાં યુવકનું સ્થળ ઉપર મોત થયું હતું. જ્યારે ઠક્કરનગર રોડ કૃષ્ણનગરમાં એક્ટિવા અને એક્સેસ વચ્ચે અકસ્માતથી યુવકનું મોત થયું હતું તેમજ શાહીબાગ ચામુંડા બ્રિજ ઉપર રોડ ક્રોસ કરી રહેલ અજાણ્યા યુવકને અજાણ્યા વાહન ચાલકે ટક્કર મારતા મોત થયું હતું. આ ત્રણયે બનાવમાં ટ્રાફિક પોલીસે ગુનો નોંધીને સીસીટીવી ફૂટેજ આધારે તપાસ હાથ ધરી છે.
અકસ્માતના ત્રણેય બનાવમાં યુવકોને મોતને ઘાટ ઉતારી વાહન ચાલકો ભાગી ગયા ઃ ટ્રાફિક પોલીસે ગુનો નોંધી સીસીટીવી ફૂટેજ આધારે તપાસ શરુ
બાપુનગરમાં રહેતો તથા ફિઝીયોથેરાપીનો માસ્ટરમાં અભ્યાસ કરતો યુવક જેમાં ગઇકાલે સવારે બાઇક લઇને નરોડા-દહેગામ રોડ ઉપરથી પસાર થઇ રહ્યા હતા ત્યારે ધ વ્હાઇટ હાઉસ પાસે પૂરઝડપે આવી રહેલા સળિયા ભરેલા ટ્રેલર ચાલકે બાઇકને ટક્કર મારી હતી જેથી યુવક રોડ ઉપર પટકાયો હતો. આ દરમિયાન ટ્રેલરનું ટાયર યુવક પરથી ફરી વળતા માથું છુંદાઇ ગયું અને પેટ સહિત શરીરે ગંભીર ઇજાના કારણે ઘટના સ્થળે જ મોત થયું હતું અકસ્માત કરીને વાહન ચાલક ભાગી ગયો હતો.
બીજા બનાવમાં હીરાવાડી ખાતે રહેતો યુવક તા. ૭ના રોજ મોડી રાતે કામ અર્થે એક્સેસ લઇને ઠક્કરનગરથી માધવ મોલ તરફ જતા હતા. ત્યારે કૃષ્ણનગર માધવ બંગ્લોઝ પાસે પહોચ્યા તે સમયે પૂરઝડપે આવી રહેલા એક્ટિવા ચાલકે એક્સેસને ટક્કર મારતા યુવક રોડ ઉપર પટકાતા ગંભીર ઇજા થતાં સારવાર દરમિયાન તેમનું મોત થયું હતું.
ત્રીજા બનાવમાં શાહીબાગ ચામુંડા બ્રિજ પર તા. ૫ના રોજ રાતના સમયે અજાણ્યો યુવક ચાલતા રોડ ક્રોસ કરી રહ્યો હતો. આ સમયે પૂરઝડપે આવી રહેલા અજાણ્યા વાહન ચાલકે યુવકને ટક્કર મારતા સારવાર દરમ્યાન મોત નીપજ્યું હતું.
