વડોદરાઃ એમ.એસ.યુનિવર્સિટીના પદવીદાન સમારોહના આયોજનને એક મહિના કરતા વધારે સમય થઈ ગયો છે પણ હજી સુધી ૨૫૦૦ કરતા વધારે ડિગ્રીઓ વિવિધ ફેકલ્ટીઓમાં અને પરીક્ષા વિભાગમાં પડી રહી છે.
જેને ધ્યાનમાં રાખીને યુનિવર્સિટીના પરીક્ષા વિભાગ હવે ઓન ધ સ્પોટ ડિગ્રી વિતરણ શરુ કર્યું છે.પરીક્ષા વિભાગના સત્તાવાર સૂત્રોએ કહ્યું હતું કે, જે વિદ્યાર્થીઓએ ડિગ્રી નથી મેળવી તેઓ યુનિવર્સિટી હેડ ઓફિસ ખાતે આવીને ત્યાં જ ફોર્મ અને ડિગ્રી મેળવવા માટેની ફી ભરી શકશે અને તેમને એ જ દિવસે હેડ ઓફિસ ખાતેથી ડિગ્રી મળી શકશે.પહેલા બાકી રહેલા વિદ્યાર્થીઓ માટે ફોર્મ ભરવાની તારીખ જાહેર કરાતી હતી અને એ પછી ડિગ્રી લેવા માટે વિદ્યાર્થીઓને બોલાવાતા હતા પણ આ પ્રથા હવે કાઢી નાંખવામાં આવી છે.પરીક્ષા વિભાગના કહેવા પ્રમાણે ડિગ્રી મેળવવા માટે વિદ્યાર્થીઓનું એબીસી(એકેડમિક બેન્ક ઓફ ક્રેડિટ) એકાઉન્ટ ફરજિયાત બનાવેલું જરુરી છે.તેની સાથે વિદ્યાર્થીએ પોતાનું આઈડી પ્રૂફ રજૂ કરવું પડશે અને વિદ્યાર્થીની જગ્યાએ અન્ય કોઈ ડિગ્રી લેવા માટે આવે તો તેણે વિદ્યાર્થીનો સંમતિ પત્ર તથા વિદ્યાર્થીઓનું એબીસી એકાઉન્ટનો પૂરાવો તથા ઓળખનો પૂરાવોર બતાવવો પડશે.વિદ્યાર્થીઓ ઈચ્છે તો ડિગ્રી માટે પહેલા ઓનલાઈન ફોર્મ અને ફી ભરીને પણ હેડ ઓફિસ ખાતે ડિગ્રી લેવા આવી શકે છે.
ફેકલ્ટીઓ પાસેથી ડિગ્રીઓ પાછી મંગાવાઈ
યુનિવર્સિટીના કોન્વોકેશનમાં ૧૫૦૦૦ વિદ્યાર્થીઓને ડિગ્રીઓ એનાયત કરાઈ હતી.આ ડિગ્રીઓ વિતરણ માટે વિવિધ ફેકલ્ટીઓમાં મોકલવામાં આવી હતી.કોન્વોકેશનના એક મહિના બાદ હવે ફેકલ્ટીઓમાં પડી રહેલી ડિગ્રીઓ પરીક્ષા વિભાગે પાછી મંગાવવાનું શરુ કર્યું છે. આગામી સોમવારથી હવે ફેકલ્ટી સ્તરે ડિગ્રી વિતરણ નહીં થાય અને વિદ્યાર્થીઓએ હેડ ઓફિસ ખાતેથી જ ડિગ્રી મેળવવાની રહેશે.
