Vadodara Cyber Crime : ચાઈનીઝ ગેંગ દ્વારા કરવામાં આવતી સાયબર ઠગાઈના નાણાંની હેરફેર માટે મ્યુલ એકાઉન્ટ પુરા પાડતા તત્વો સામે ચાલી રહેલી કાર્યવાહી દરમિયાન વડોદરામાં વધુ એક ગુનો નોંધાયો છે.
સાયબર ક્રાઇમ દ્વારા લોકો સાથે ઠગાઈ કરી પોતાના નામે અથવા અન્યના નામે બેંક એકાઉન્ટ ખોલાવી, તે ખાતાઓ મારફતે ઠગાઈના નાણા ભેજાબાજ મળતિયાઓ સુધી પહોંચાડીને કમિશન મેળવવામાં આવતું હોવાનું બહાર આવ્યું છે. આ સંદર્ભે રાવપુરા પોલીસે સ્ટેટ બેન્ક ઓફ ઇન્ડિયા, સયાજીગંજ શાખાના એક બેંક ખાતાનું કેવાયસી અને સ્ટેટમેન્ટ મેળવી વિશ્લેષણ કર્યું હતું. તપાસ દરમિયાન તા.7 એપ્રિલના રોજ રૂ.5 લાખની અનઑથોરાઇઝ્ડ ટ્રાન્ઝેક્શન થયું હતું. ઉપરાંત નેશનલ સાયબર ક્રાઇમ રિપોર્ટિંગ પોર્ટલ (NCRP) પર આ ખાતા સામે કુલ 6 ફરિયાદો નોંધાયેલી હોવાનું પણ સામે આવ્યું છે. પોલીસ તપાસમાં ખુલ્યું કે, આરોપીઓએ અનઑથોરાઇઝ્ડ નાણાંની સગેવગે કરી ગુનો આચરવામાં આવ્યો હોવાના પુરાવા મળ્યા છે. આ મામલે પોલીસે બેંક ખાતાધારક મિહિર કિરણ સોલંકી, ખાતાનો ઉપયોગ કરનાર તેના પિતા કિરણ હીરા સોલંકી (બંને રહે. સ્લમ ક્વાર્ટર્સ, તુલસીવાડી) તેમજ સંગઠિત કાવતરામાં સંકળાયેલા અન્ય શખ્સો સામે ભારતીય ન્યાય સંહિતા (BNS) ની કલમ 318(4), 61(2) અને 112(2) મુજબ ગુનો નોંધ્યો છે
0.5 ટકા કમિશન લઈ રૂ.5 લાખ આંગડિયા મારફતે સુરત મોકલ્યા
આરોપી મિહિરના બેંક ખાતામાં તેના પિતા કિરણ સોલંકીએ દેવાંગ નામના મિત્રના રૂ.5 લાખ RTGS થકી ટ્રાન્સફર કર્યા હતા. આ વ્યવહાર બદલ કિરણ સોલંકીએ 0.5 ટકા કમિશન મેળવ્યું હતું. બાદમાં મિહિરના ખાતામાંથી ચેક મારફતે નાણાં ઉપાડી દેવાંગે આપેલા નામ-સરનામે રૂ.5 લાખ આંગડિયા મારફતે સુરત મોકલી આપવામાં આવ્યા હતા.
ગઈકાલે 5 લોકો સામે ગુના નોંધાયા
ઓનલાઇન ઠગાઈમાં જે બેંક ખાતાનો ઉપયોગ થાય છે તેની માહિતી નેશનલ સાયબર પોર્ટલ મારફતે પોલીસને મળી રહી છે. તેના આધારે સ્થાનિક પોલીસ દ્વારા કમિશન લઈ ઓનલાઇન ઠગો માટે બેંક ખાતાની સગવડ પૂરી પાડતા ખાતાધારકો સામે ગુના નોંધવામાં આવી રહ્યા છે. ગઈકાલે છાણી પોલીસે બેંક ઓફ બરોડા તેમજ ફતેગંજની કેનેરા બેન્ક અને બેંક ઓફ મહારાષ્ટ્રના બે ખાતાધારકો તથા ખાતા ઓપરેટ કરનાર ત્રણ વ્યક્તિઓ સામે ગુના નોંધ્યા હતા.
