મ્યુ.કોર્પોરેશન દ્વારા આજે પશ્ચિમ ઝોનની કચેરી, અકોટા ખાતેથી રાજ્ય સરકારના દંડક અને મેયરની ઉપસ્થિતિમાં શહેરમાં ડોર-ટુ-ડોર ગાર્બેજ કલેક્શન માટેના નવા વાહનોનું ફલેગ-ઓફ કરવામાં આવ્યું હતું.
શહેરના પશ્ચિમ ઝોનમાંથી દૈનિક ઉત્પન્ન થતા ઘન કચરાના ડોર-ટુ-ડોર કલેક્શન તથા ટ્રાન્સપોર્ટેશનની કામગીરી કોન્ટ્રાક્ટરને આગામી ૧૦ વર્ષ માટે સોંપવામાં આવી છે. પશ્ચિમ ઝોનના કુલ પાંચ વોર્ડ, વોર્ડ નબર. ૮, ૯, ૧૦, ૧૧ અને ૧૨માં પી.ઓ.આઈ. (પોઈન્ટ ઓફ્ ઈન્ટરેસ્ટ) આધારિત રહેણાંક અને કોમર્શિયલ પ્રોપર્ટીનો સર્વે હાથ ધરવામાં આવ્યો હતો, જેમાં સર્વે ટીમોની રચના, જી.પી.એસ. લોકેશન ટેગિંગ પી.ઓ.આઈ. માર્કિંગ અંગે તાલીમ આપવામાં આવી હતી. તમામ રહેણાંક મકાનો, કોમર્શિયલ એકમો અને સોસાયટીઓના પ્રવેશદ્વારના ફોટા સાથે જી.પી.એસ. ટેગિંગ કરવામાં આવ્યું હતું અને પી.ઓ.આઈ. માં યુનિટોની સંખ્યા નોંધવામાં આવી હતી.
પાંચ વોર્ડના સર્વે મુજબ પશ્ચિમ ઝોનમાં કુલ ૩,૦૧, ૩૫૪ પ્રોપર્ટી નોંધાઈ છે, જેમાંથી ૨,૬૯,૭૨૨ રહેણાંક અને ૩૧,૬૩૨ કોમર્શિયલ પ્રોપર્ટીનો સમાવેશ થાય છે. ઝોનમાં કુલ ૪,૭૯૯ પી.ઓ.આઈ. નિર્ધારિત કરવામાં આવ્યા છે. કચરા કલેક્શન માટે કુલ ૨૬૬ રહેણાંક અને કોમર્શિયલ વાહનો કાર્યરત રહેશે. આ ઉપરાંત કિચન વેસ્ટ માટે પવાહનો, ગાર્ડન વેસ્ટ માટે ૫ જેસીબી અને પ હાઈવા, તેમજ ધાર્મિક કચરાના નિકાલ માટે ૧વાહન કાર્યરત રાખવામાં આવ્યું છે. સાંકડી ગલીઓ, સેવા વસાહતો, હેંગિંગ ડસ્ટબિન અને ક્વિક રિસ્પોન્સ કામગીરી માટે કુલ ૪૫ ઈ-રીક્ષાઓનો ઉપયોગ કરવામાં આવશે. આ રીતે સ્પેર વાહનો સહીત પશ્ચિમ ઝોનમાં કુલ ૩૯૭વાહનો કાર્યરત રહેશે.
