જીઆઇડીસીના ગોડાઉનમાં એલસીબીનો દરોડો
ગોડાઉન માલિક સામે ગુનો દાખલ કરીને દારૃ બિયરની ૨,૩૪૦ જેટલી બોટલ કબજે કરવામાં આવી
ગાંધીનગર : આગામી નાતાલ અને નવા વર્ષના તહેવારોને અનુલક્ષીને ગાંધીનગર
જિલ્લામાં પ્રોહિબીશનની પ્રવૃત્તિ અટકાવવા માટે પોલીસ દ્વારા સઘન ચેકિંગ હાથ
ધરવામાં આવ્યું છે. આ ડ્રાઈવ દરમિયાન ગાંધીનગર એલસીબી ટુની ટીમે દહેગામમાં આવેલી
ઝાંક જીઆઇડીસીના એક ગોડાઉનમાં દરોડો પાડી લાખો રૃપિયાનો વિદેશી દારૃ ઝડપી પાડયો
છે.
ગાંધીનગર જિલ્લામાં દારૃની હેરાફેરી અને વેચાણ અટકાવવાની
સાથે જુગાર જેવી પ્રવૃત્તિઓ રોકવા માટે ગાંધીનગર રેન્જ ડીઆઇજી વિરેન્દ્રસિંહ યાદવ
અને જિલ્લા પોલીસવડા રવિ તેજા વાસમશેટ્ટી દ્વારા આપવામાં આવેલી સૂચનાને પગલે
પોલીસની અલગ અલગ ટીમો જે તે વિસ્તારમાં કામગીરી કરી રહી છે ત્યારે ગાંધીનગર એલસીબી
ટુના પોલીસ ઇન્સ્પેક્ટર એચ.પી પરમાર દ્વારા સ્ટાફના માણસોને આ દિશામાં કાર્યવાહી
કરવા માટે તાકીદ કરવામાં આવી હતી દરમિયાનમાં ટીમ દહેગામ વિસ્તારમાં પેટ્રોલિંગમાં
હતી તે દરમિયાન બાતમી મળી હતી કે,
ઝાંક જીઆઇડીસીમાં આવેલા કડાદરા વાઇબ્રન્ટ પ્રાઇમ એન્ડ
પાર્કના પ્લોટ નં-૧૫૯ ના ગોડાઉનમાં એક પીક-અપ ડાલામાં ગેરકાયદેસર રીતે વિદેશી દારૃ
ભરી રાખવામાં આવ્યો હતો. જેના આધારે પોલીસે બાતમીવાળી જગ્યાએ રેડ કરતા ગોડાઉનમાંથી
એક બંધ બોડીની મહિન્દ્રા બોલેરો મળી આવી હતી. પોલીસે પાછળનું લોક ખોલીને તપાસ કરતા
તેમાંથી વિદેશી દારૃ અને બિયરનો જથ્થો મળી આવ્યો હતો. પોલીસે કુલ ૨૩૪૦ નંગ વિદેશી
દારૃ-બિયરની બોટલો જપ્ત કરી છે. દારૃ અને પીકપ ડાલુ મળીને કુલ ૧૮.૩૨ લાખ રૃપિયાનો
મુદ્દામાલ કબજે કરવામાં આવ્યો છે અને ગોડાઉનના માલિક સહિત બે સામે ગુનો દાખલ કરીને
તેમની શોધખોળ શરૃ કરવામાં આવી છે.
