ચાર શખ્સ સામે કાર્યવાહી – ૨૮,૬૫૦નો મુદ્દામાલ જપ્ત
૮૦ ફૂટ રોડ, રતનપર બાયપાસ રોડ અને મેઘાણી રોડ પરના ચાર પાન પાર્લરમાંથી ગોગો સિગારેટનો જથ્થો ઝડપાયો
સુરેન્દ્રનગર – સુરેન્દ્રનગર એસઓજી અને બી-ડિવિઝન પોલીસે શહેરી વિસ્તારમાં ચેકિંગ હાથ ધરી ગેરકાયદે ગોગો સિગારેટનું વેચાણ કરતા ચાર પાન પાર્લરના માલિકોને ઝડપી પાડી ૩૧૮૫ ગોગો કોન-પેપર કબજે કર્યા છે.
સુરેન્દ્રનગર એસઓજી પોલીસે વઢવાણ ૮૦ ફૂટ રોડ પર, દેશળ ભગતની વાવ પાસે આવેલ રાજ પાન પાર્લર, રતનપર સાંઇ હોટલ પાછળ આવેલ ડીલક્ષ પાન પાર્લર અને રતનપર બાયપાસ રોડ પર આવેલ સ્મોક લાઇટ પાન પાર્લરમાં ચેકિંગ હાથ ધરી ત્રણેય પાન પાર્લરના માલિકોને અલગ અલગ ફ્લેવરના ગેરકાયદેસર સ્મોકિંગ સિગારેટ (કોન) નંગ ૩૩૫, કિંમત રૃ.૩૩૫૦નો મુદામાલ કબજે કર્યોે હતો અને તમામ વિરૃદ્ધ એ-ડિવિઝન તેમજ જોરાવરનગર પોલીસ મથકે અલગ અલગ ૦૩ ગુના નોંધી કાર્યવાહી હાથ ધરી છે.
બીજી બાજુ સુરેન્દ્રનગર બી-ડિવિઝન પોલીસે મેઘાણી રોડ પર રહેતા અને ઘર પાસે જ પાનનો ગલ્લો ધરાવતા શખ્સ કમલેશભાઈ ઉર્ફે કમાલાલ વસંતભાઈ દલીચાને રહેણાંક મકાનમાંથી ગોગો પેપર કોનના ૧૨૦૦ રોલ રૃ.૧૩,૩૦૦, તેમજ ૧૬૫૦ રોલીંગ પેપર સહિત કુલ રૃ.૨૫,૩૦૦નો મુદામાલ કબજે કરી બી-ડિવિઝન પોલીસ મથકે ગુનો નોંધી કાયદેસરની કાર્યવાહી હાથ ધરી છે.
એસઓજી અને બી-ડિવિઝન પોલીસ દ્વારા ઝડપાયેલ પાન પાર્લરના માલિકો
(૧) રાજુભાઈ ઈશ્વરભાઈ રંગાડીયા (રાજ પાન પાર્લર)
(૨) ધરમશીભાઈ ગોવિંદભાઈ આલ (ડિલક્ષ પાન પાર્લર)
(૩) અશ્વિનભાઈ ઘનશ્યામભાઈ કાલીયા (સ્મોક લાઈટ પાન પાર્લર)
(૪) કમલેશભાઈ ઉર્ફે કમાલાલ વસંતભાઈ દલીચા (મેઘાણી રોડ)
શહેરના અનેક પાન પાર્લરમાં ગોગો કોન-પેપર વેચાતા હોવાની ફરીયાદ
સુરેન્દ્રનગર તેમજ વઢવાણ સહિતના શહેરી વિસ્તારમાં અનેક પાનના ગલ્લા તેમજ જનરલ સ્ટોર્સમાં ઘણા સમયથી ગેરકાયદેસર ગોગો સિગારેટનું ખુલ્લે આમ વેચાણ થતું હોવાની ફરિયાદો ઉઠવા પામી છે. માત્ર દસ રૃપિયામાં મળતા ગોગો કોન અને પેપરમાં ચરસ, ગાંજો સહિતના નશાકારક વસ્તુ ભરી યુવાનો સિગારેટની માફક જાહેરમાં કસ મારતા હોય છે.
