વડોદરા,રાજસ્થાનથી મહારાષ્ટ્ર જતી લક્ઝરી બસ અમદાવાદ વડોદરા એક્સપ્રેસ હાઇવે પર મહીસાગર નદીના બ્રિજ નજીક બ્રેક ડાઉન થઇ હતી. જેથી, બસ સાઇડ પર ઊભી રાખી પાછળના ભાગે આડશો મૂકી ડ્રાઇવર આગળના ભાગે લાઇટ ચેક કરતો હતો. તે દરમિયાન પાછળથી આવતી એક ટ્રક બસમાં ઘુસી જતા ડ્રાઇવરનું મોત થયું હતું. જ્યારે અન્ય પાંચ મુસાફરોને ઇજા પહોંચી હતી.
રાજસ્થાનના ઝાલોર જિલ્લાના આહોર ગામે રમેશભાઇ હંસાજી ચૌધરીની ટ્રાવેલ્સ કંપનીની લક્ઝરી બસ લઇને બે ડ્રાઇવર ગુલાબસિંહ વિરેન્દ્રસિંહ રાઠોડ તથા વલીમોહંમદ જહાંગીર ખાન રાજસ્થાનની મહારાષ્ટ્ર જવા નીકળ્યા હતા. પાલનપુર હાઇવે છાપી પોસ હોટલમાં જમ્યા પછી ડ્રાઇવર વલીમોહંમદ બસ ચલાવતો હતો. મોડી રાત્રે એક વાગ્યે અમદાવાદ વડોદરા એક્સપ્રેસ હાઇવે પર મહીસાગર નદીના બ્રિજથી થોડે આગળ ગયા પછી બસની લાઇટો એકદમ બંધ થઇ ગઇ હતી. બ્રેક ડાઉન થયેલી લક્ઝરી બસ સાઇડ પર ઊભી રાખી હતી. કેટલાક મુસાફરો નીચે ઉતર્યા હતા.ડ્રાઇવર વલીમોંહમદ બ્રેક ડાઉન બસની પાછળ પથ્થર અને ઝાડીઓની આડશ મૂકીને બસની આગળ જઇ લાઇટ રિપેરીંગ કરતો હતો. તે દરમિયાન પાછળથી પૂરઝડપે આવેલી ટ્રક લક્ઝરી બસમાં ઘુસી જતા અકસ્માત થયો હતો. ડ્રાઇવર વલી મોહંમદ બસ સાથે ઢસડાયો હતો. તેને માથા તથા પેટના ભાગે ગંભીર ઇજા થઇ હતી. જ્યારે લક્ઝરી બસમાં બેઠેલા પાંચ મુસાફરોને પણ ઇજા થતા તેઓને સારવાર માટે સયાજી હોસ્પિટલમાં દાખલ કરવામાં આવ્યા હતા. સ્થળ પર ટ્રક મૂકીને નાસી છૂટેલા ટ્રક ડ્રાઇવર સામે ભાદરવા પોલીસે ગુનો દાખલ કરી કાયદેસરની કાર્યવાહી હાથ ધરી છે.
અકસ્માતમાં બે મુસાફરોના ઘુંટણની નીચેના પગ કપાઇ ગયા
(૧) બ્રિજ વિલાસ સાવલરામ ચૌધરી (રહે. બાડમેર રાજસ્થાન)ને માથામાં (૨) રાણારામ તેજારામ ચૌધરી (રહે.બાડમેર) ને પગ અને ખભામાં ઇજા થઇ હતી. જ્યારે (૩) ભવરસિંગ મોડસિંગ રાઠોડ (રહે .ઝાલોદ રાજસ્થાન) તથા (૪) બાબુસીંગ સરદારસીંગ રાજપૂત(રહે.સાઈ કોલોની થાના મહારાષ્ટ્ર)ના ઘુંટણની નીચેના પગ કપાઇ ગયા હતા. જ્યારે ભાવેશ શંકરભાઇરાણા (રહે.રાજસ્થાન)ને ડાબા પગે ઈજાઓ પહોંચી હતી. તેઓને સારવાર માટે સયાજી હોસ્પિટલમાં દાખલ કરવામાં આવ્યા છે.
