Controversial Post About Geniben Thakor: પાટડી તાલુકાના નવરંગપુરા ગામના યુવાન ચિંતન મહેતાની ફેસબુક પોસ્ટને કારણે કોંગ્રેસ અને ઠાકોર સમાજમાં રોષ ફાટી નીકળ્યો હતો. ચિંતન મહેતાએ ફેસબુક એકાઉન્ટ પરથી કોંગ્રેસ સાંસદ ગેનીબેન ઠાકોર વિરુદ્ધ વિવાદિત ટિપ્પણી કરી હતી. આ પોસ્ટ વાઈરલ થતાં ઠાકોર સમાજ લાલઘૂમ બની ગયો હતો. કોંગ્રેસના વિરોધ બાદ પોસ્ટ મુકનાર યુવક ચિંતન મહેતાએ ઠાકોર સમાજ અને કોંગ્રેસની માફી માંગી પોસ્ટ હટાવી દીધી હતી.
શું હતો સમગ્ર મામલો?
નવરંગપુરા ગામના ચિંતન મહેતાએ પોતાના ‘સી.એમ. સરકાર’ નામના ફેસબુક એકાઉન્ટ પરથી કોંગ્રેસ સાંસદ ગેનીબેન ઠાકોર વિરુદ્ધ વક્ફ બોર્ડ સંશોધન બિલના સંદર્ભમાં વિવાદિત ટિપ્પણી કરી હતી. જેમા તેણે હિન્નકક્ષાની ભાષાનો ઉપયોગ કર્યો હતો. આ ઘટનાને પગલે પાટડી ચાર રસ્તા પાસે કોંગ્રેસના પૂર્વ ધારાસભ્ય નૌશાદ સોલંકી સહિત ઠાકોર સમાજના આગેવાનોએ રસ્તા પર ચક્કાજામ કરી વિરોધ કર્યો હતો. ચક્કાજામને પગલે રસ્તા પર ટ્રાફિકજામના દ્રશ્યો પણ સર્જાયા હતા અને પોલીસે સ્થળ પર પહોંચી ચક્કાજામ કરી રહેલા લોકોને સમજાવવાના પ્રયાસો હાથ ધર્યા હતા.
જોકે લોકોમાં વિરોધ યથાવત જોવા મળ્યો હતો જ્યારે પોલીસે ચક્કાજામ કરી રહેલા લોકો પૈકી પૂર્વ ધારાસભ્ય નૌશાદ સોલંકી સહિત 20થી વ્યક્તિઓની અટકાયત કરી પોલીસ મથકે લઈ જવામાં આવ્યા હતા. વિરોધ કરી રહેલા આગેવાનોએ પોસ્ટ મુકનાર ચિંતન મહેતા સામે કડક કાર્યવાહી કરી જાહેરમાં માફી માંગવાની માંગ કરી હતી.
કોંગ્રેસના લોકસભાના સાંસદ ગેનીબેન ઠાકોર વિરૂદ્ધ અપમાનજનક પોસ્ટ મુકનાર યુવક ચિંતન મહેતા વિરૂદ્ધ કઠાડા ગામના નટુજી પ્રભુજી ઠાકોરે સાયબર હેઠળ ગુનો નોંધાવી આ મામલે પાટડી પોલીસ મથકે પણ લેખીત અરજી કરી કાર્યવાહી કરવાની માંગ કરી છે. જો આ અંગે યોગ્ય પગલા ભરવામાં નહિં આવે તો આગામી દિવસોમાં ઉગ્ર આંદોલનની પણ ચિમકી ઉચ્ચારી હતી.
