વડોદરા, તા.5 ભાયલી પાસે પેટ્રોલપંપ ચાર રસ્તા પાસે એક ડમ્પરના ચાલકે બાઇક ચાલકને ખુલ્લી ધમકી આપી લોખંડની પાઇપથી હુમલો કરી માર માર્યો હતો. આ અંગે છેક ગાંધીનગર સુધી ફરિયાદ થઇ છે.
ગોત્રી વિસ્તારમાં નિલાંબર સર્કલરોડ પર જય અંબે સોસાયટીમાં રહેતા નૈસર્ગ જોષીએ ગૃહ વિભાગના સેક્રેટરીને ડમ્પરના ડ્રાઇવર, ટ્રાફિક પીઆઇ પશ્ચિમ, ભાયલી પો.સ્ટે.ના પીએસઓ તેમજ કંટ્રોલરૃમ વિરુધ્ધમાં કરેલી ફરિયાદમાં જણાવ્યું છે કે તા.૩ના રોજ સાંજે સાડા છ વાગે મારો નાનો ભાઇ પવિત્ર ભાયલીની સાઇટ પરથી તેના સહ કર્મચારી સાથે બાઇક લઇને ઓફિસ જતો હતો. નાયરા પેટ્રોલપંપ ચાર રસ્તા પાસે સિગ્નલ બંધ હોવાથી બાઇક ઊભી રાખી હતી આ વખતે એક ડમ્પરે આવીને બાઇકને ટક્કર મારી હતી.
જેથી મારા ભાઇએ ડમ્પર મારી પર ચડી ગયું હોત તો તેમ કહેતા ડમ્પરના ચાલકે દાદાગીરી કરી ચડયુ તો નથી ને તેમ કહેતા મારા ભાઇએ જીવ તો અમારો જતો, ડમ્પર શહેરમાં કેવી રીતે લઇને આવ્યો તેમ જણાવતા ચાલકે અપશબ્દો બોલવાનું શરૃ કરી ચાલ્યો જા, તારુ માથુ ફોડી નાંખીશ, ડમ્પર બાઇક પર ચડાવી દઇશ તને ખબર નથી, મારો શેઠ ભરવાડ છે, બધા પોલીસ તેમના ખિસ્સામાં છે તેવી ધમકી આપી લોંખંડની પાઇપ બતાવી માથું ફોડી નાંખીશ તેમ કહ્યુ હતું.
ડમ્પરના ચાલકે સીધો સીધો જતો રહે, તું કઇ નહી કરી શકે તેમ કહી ડમ્પરમાં બેઠા બેઠા જ લોખંડની પાઇપથી હુમલો કરતા આંખ તેમજ માથામાં ઇજા થઇ હતી. ચાલક મારા ભાઇને ડમ્પરની અંદર ખેંચી ગયો હતો અને માર માર્યો હતો. આ વખતે તેની સાથેના માણસે ડમ્પરનો કાચ તોડતા લોકો ભેગા થઇ જતા ડમ્પરનો ચાલક ભાગી ગયો હતો. ગાંધીનગર ખાતે કરાયેલી ફરિયાદમાં આક્ષેપ કર્યા છે કે પોલીસ કંટ્રોલરૃમને ફોન કરવા છતાં ફોન લાગ્યો ન હતો તેમજ ભાયલી ખાતેના પોલીસ સ્ટેશનમાં ફોન કરતા પીએસઓએ વર્ધી લખાવો તેમ કહી ફોન મૂકી દીધો હતો.
