સ્ટેટ જીએસટી વિભાગની ત્રીજા દિવસે તપાસ શરૂ
કમ્પોઝિશન ડિલરની મર્યાદાના ભંગ બદલ શેરવાનીના વેપારી સામે કાર્યવાહી, પરફ્યુમના વેપારીને ત્યાં તપાસ યથાવત્
ભાવનગર: શહેરના પરફ્યૂમના વેપારીના ત્રણ સ્થળોએ સ્ટેટ જીએસટીની એન્ફોર્સમેન્ટની ટીમો અને રેડિમેઈડ કપડાના વેપારીના એક સ્થળે સ્ટેટ જીએસટી ભાવનગર વિભાગની ટીમે ગત મંગળવારના રોજ તપાસ શરૂ કરી હતી. જે પૈકી રેડિમેઈડ કપડાના વેપારીને કમ્પોઝિશન ડિલરની મર્યાદાના ભંગ બદલ રૂ.૨૦ લાખનો વેરો વ્યાજ અને દંડ ફટકારવામાં આવ્યો છે. જ્યારે પરફ્યૂમના વેપારીના ત્યાં ત્રીજા દિવસે તપાસ યથાવત્ હતી અને તે પૂર્ણતાના આરે હોવાનું જાણવા મળ્યું છે.
શહેરમાં પરફ્યુમના ઉત્પાદક અને વેપારી મનીષ પરફ્યૂમના ત્રણ સ્થળોએ સ્ટેટ જીએસટી વિભાગની એન્ફોર્સમેન્ટની ટીમો અને હિલડ્રાઈવ વિસ્તારમાં આવેલી એ-વન શેરવાની નામના રેડિમેઈડ કપડાના વેપારીને ત્યાં સ્ટેટ જીએસટી ભાવનગર વિભાગની ટીમે ગત મંગળવારના રોજ તપાસ હાથ ધરી હતી. જે પૈકી શેરવાનીના વેપારીને ત્યાં ત્રણ દિવસ સુધી ચાલેલી તપાસમાં વેપારીએ કમ્પોઝિશન ડિલરની રૂ.૫૦ લાખની મર્યાદાનો ભંગ કર્યો હોવાનું ખુલતા જીએસટી વિભાગે વેપારીને વેરો, વ્યાજ અને દંડ રૂ.૨૦ લાખ ફટકાર્યો છે. આ તપાસ બાદ આગામી દિવસોમાં કમ્પોઝિશન ડિલરોને ત્યાં જીએસટી વિભાગની તપાસ આવી શકે છે. બીજી તરફ પરફ્યૂમના વેપારીને ત્યાં ચાલી રહેલી તપાસ આજે ત્રીજા દિવસે પણ યથાવત્ રહી હતી અને આ તપાસ પૂર્ણતા તરફ હોવાનું સૂત્રો પાસેથી જાણવા મળ્યું છે.
