Ahmedabad News: અમદાવાદમાં હનીટ્રેપનો એક આંખ ઉઘાડતો કિસ્સો સામે આવ્યો છે. આરોપી પરિવારની ગેંગ ઉંમરલાયક લોકોને પ્રેમમાં ફસાવી કર્ણાવતી એન્કલેવ ખાતે ભાડે રાખેલા ફ્લેટ પર બોલાવી ધાક ધમકીથી રૂપિયા પડાવવાનો ખેલ કરતાં હતા. અમદાવાદની રામોલ પોલીસે આજે બુધવારે ત્રણ આરોપીઓની ધરપકડ કરી છે જ્યારે ગુનામાં સામેલ એક મુખ્ય સૂત્રધાર અને ત્રણ મહિલાઓ ફરાર છે.
કેવી રીતે હનીટ્રેપમાં ફસાવતા?
સૌ પ્રથમ આરોપીઓ સોશિયલ મીડિયાના માધ્યમથી ઉંમરલાયક માણસને શોધતા હતા. આરોપીની માતા, પત્ની અને ગર્લફ્રેન્ડ વૃદ્ધને કોઈના કોઈ રીતે ફોસલાવી કર્ણાવતી એન્કલેવ ખાતેના એક ફ્લેટમાં બોલાવતા હતા. બાદમાં જ્યારે વૃદ્ધ ઓફિસ પહોંચે પછી નકલી પોલીસ બની ઉંમરલાયક વ્યક્તિને ડરાવતા ધમકાવતા હતા. અને ખોટા કેસમાં ફસાવવાનું કહી 20 લાખ જેટલી મોટી રકમની માંગણી કરી પૈસા પડાવતા હતા.
પોલીસે ત્રણ આરોપીની કરી ધરપકડ
સમગ્ર બાબતે રામોલ પોલીસને કંટ્રોલ રૂમ દ્વારા જાણ કરવામાં આવી હતી. જે બાદ પોલીસે વોચ ગોઠવી આરોપીઓના હનીટ્રેપની જંજાળનો પર્દાફાશ કર્યો હતો. પોલીસે ફ્લેટ પર પહોંચી વૃદ્ધને ફસાવી 20 હજાર પડાવી લેનાર ત્રણ આરોપીઓ ઉપેશ સરવૈયા, હિતેન ચૌહાણ અને અસફાક શેખને ઝડપી લીધા હતા. તેમની પાસેથી 20,000 રોકડા ગુનામાં ઉપયોગમાં લેવાયેલા ત્રણ ફોર વ્હીલર વાહનો અને પાંચ મોબાઇલ ફોન જપ્ત કર્યા હતા. જેની કિંમત 19 લાખથી વધુ આંકવામાં આવી છે.
ચાર આરોપી ફરાર, શોધખોળ શરૂ
પોલીસે હનીટ્રેપનું રેકેટ સાથે સંકળાયેલા અને હાલ ફરાર થયેલા અન્ય ચાર આરોપીઓના નામ પણ જાહેર કર્યા છે, જેમાં રવિન્દ્ર કુમાર પ્રભુભાઈ હડવડિયા, ગીતાબેન રણધીરભાઈ ગોહિલ, સંગીતાબેન મુકેશભાઈ ચૌહાણ અને નાઝ ઉર્ફે કિંજલ પટેલ ખાનનો સમાવેશ થાય છે. આરોપીઓને પકડવા માટે પોલીસે અલગ અલગ ટીમો બનાવી ચક્રો ગતિમાન કર્યા છે.
આ પણ વાંચો: મૂકબધિર બાળકીનો પિતા સાથે મેળાપ: પરિવારને શોધવા અમદાવાદની અભયમ ટીમે અનોખો રસ્તો અપનાવ્યો
પોલીસે આરોપીની ધરપકડ બાદ જણાવ્યું હતું કે, મુખ્ય આરોપી રવિએ પત્ની સાથે મળી ગુનામાં વપરાયેલો ફ્લેટ 8 મહિના પહેલા રાખ્યો હતો. તે સોશિયલ મીડિયાથી ઉંમર લાયક લોકોને ટાર્ગેટ કરી ઘરે બોલાવતા હતા. આરોપીઓ અગાઉથી જે વ્યક્તિને ભોગ બનાવ્યો હોય તેમની પાસેથી અન્ય વ્યક્તિનો કોન્ટેક્ટ મેળવવા હતા. જે આરોપીઓ આ રેકેટમાં સામેલ છે તેમાંથી ત્રણ આરોપીઓ પહેલાથી ગુનાહિત ઈતિહાસ ધરાવે છે.
