Ahmedabad liquor seizure 2025: અમદાવાદમાં વર્ષ 2024ની સરખામણીએ વર્ષ 2025માં દારૂ ઝડપાવવાના પ્રમાણમાં બમણો વધારો નોંધાયો છે. વર્ષ 2024માં રૂપિયા 6.96 કરોડની કિંમતનો દારૂ પકડાયો હતો, જે આંકડો વર્ષ 2025માં વધીને રૂપિયા 13.62 કરોડથી વધુ પર પહોંચ્યો છે. આ ઉપરાંત, વર્ષ 2025 દરમિયાન શહેરમાંથી રૂપિયા 3.88 કરોડની કિંમતના માદક દ્રવ્યો અને ડ્રગ્સ પણ જપ્ત કરવામાં આવ્યા હોવાનું સામે આવ્યું છે.
અમદાવાદમાં એક જ વર્ષમાં દારૂ પકડાવવાનું પ્રમાણ બમણું
અમદાવાદ શહેરમાં વર્ષ 2024ની સરખામણીએ વર્ષ 2025માં દેશી અને વિદેશી દારૂ ઝડપાવવાના પ્રમાણમાં બમણો વધારો જોવા મળ્યો છે. વર્ષ 2025ના આંકડા મુજબ, વિદેશી દારૂની વાત કરીએ તો ₹11.85 કરોડનો જથ્થો ઝડપાયો છે, જે વર્ષ 2024માં ₹6.12 કરોડ હતો. તેવી જ રીતે, દેશી દારૂમાં પણ મોટો ઉછાળો આવ્યો છે; વર્ષ 2024માં ₹83.55 લાખનો જથ્થો પકડાયો હતો, જે 2025માં વધીને ₹1.77 કરોડ પર પહોંચ્યો છે.
પોલીસ સ્ટેશન મુજબની કાર્યવાહીમાં, અમદાવાદના સરદારનગર પોલીસ સ્ટેશન વિસ્તારમાંથી સૌથી વધુ વિદેશી અને દેશી દારૂનો જથ્થો જપ્ત કરવામાં આવ્યો છે. જ્યારે ડ્રગ્સ અને અન્ય કેફી પદાર્થો પકડવાની કામગીરીમાં ડી.સી.બી.(DCB) પોલીસ સ્ટેશન સમગ્ર શહેરમાં મોખરે રહ્યું છે.
આ પણ વાંચો: ગુજરાતમાં આજે 5 જિલ્લામાં કમોસમી વરસાદની આગાહી, ભરૂચમાં પવન સાથે ધડબડાટી બોલાવી
અમદાવાદમાં દરરોજ સરેરાશ ₹3.73 લાખનો દારૂ ઝડપાયો
અમદાવાદ શહેરમાં નશાબંધીની અમલવારીના આંકડા જોતા માલૂમ પડે છે કે, શહેરમાંથી દરરોજ સરેરાશ ₹3.73 લાખની કિંમતનો દારૂ ઝડપાય છે. વર્ષ 2025માં પોલીસની કાર્યવાહી દરમિયાન સરદારનગર પોલીસ સ્ટેશન સૌથી વધુ સક્રિય રહ્યું હતું, જ્યાંથી 8,941 લિટર દેશી દારૂ અને 71,932 વિદેશી દારૂની બોટલો જપ્ત કરવામાં આવી હતી. વર્ષ 2025માં ડી.સી.બીમાંથી 21 કિલો 819 ગ્રામ, મેઘાણીનગરમાંથી 10 કિલો 250 ગ્રામ, ખોખરામાંથી 9 કિલો 91 ગ્રામ જેટલું ડ્રગ્સ ઝડપાયું હતું.
