રિપોર્ટ: અનુજ ઠાકર.
અમદાવાદ સિંધુ ભવન સ્થિત Urbane Bistro ખાતે 23 ફેબ્રુઆરી 2026ના રોજ સાંજે 7 વાગ્યાથી ફિલ્મ “Marm – Ek Bhed” નો ટીઝર તથા ગીત લોન્ચ કાર્યક્રમ સફળતાપૂર્વક યોજાયો. Velvet Sky Films દ્વારા નિર્મિત આ ફિલ્મના ટીઝર અને ગીતે ઉપસ્થિત મહેમાનોમાં વિશેષ ઉત્સાહ અને ચર્ચાનો માહોલ સર્જ્યો હતો.
કાર્યક્રમ દરમિયાન ફિલ્મ સાથે સંકળાયેલા કલાકારો અને ટેક્નિકલ ટીમ ઉપસ્થિત રહ્યા હતા. મિર હનીફ, વૈશાખી શાહ, પરમેશ્વર સિરિસ્કર, ગ્રેન્સી કનેરિયા અને ‘ખોટો સિક્કો’ સહિતના કલાકારોએ શૂટિંગ દરમિયાનના અનુભવો અને ફિલ્મની વિશેષતાઓ અંગે પોતાના વિચારો વ્યક્ત કર્યા. નિર્માતા મનિશ એ. શાહ, સુજલ એમ. શાહ અને શૈલેષ આર. ડોડિયાએ ફિલ્મની રચનાત્મક પ્રક્રિયા અને વિષયવસ્તુ અંગે માહિતી આપી.
કાર્યક્રમમાં ફિલ્મનું ગીત પણ લોન્ચ કરવામાં આવ્યું, જેને ઉપસ્થિત મહેમાનો તરફથી ખૂબ જ સરાહના મળી. ગીતની ભાવનાત્મક રજૂઆત અને સંગીતની અસરકારક રચનાએ ફિલ્મના વિષયને વધુ ઊંડાણ આપ્યું. ગીતે ફિલ્મના મૂળ ભાવ — “મર્મ” — ને વધુ પ્રબળ રીતે રજૂ કર્યું.
“મર્મ” માત્ર શબ્દ નથી, એક લાગણી છે
ફિલ્મ “Marm – Ek Bhed” માત્ર એક કથા નથી, પરંતુ માનવીના અંદરના સંઘર્ષની સફર છે. “મર્મ” માત્ર શબ્દ નથી — એ એક એવી લાગણી છે, જે ઘણી વખત કહી શકાતી નથી હોતી અને દિલમાં જ દબાઈ રહે છે. દરેક વ્યક્તિના જીવનમાં કોઈ ને કોઈ મર્મ છુપાયેલો હોય છે, એ આંતરિક લડાઈ, જેને દુનિયા સંપૂર્ણ રીતે સમજી શકતી નથી.
ફિલ્મ એ પ્રશ્ન ઉઠાવે છે કે જે દેખાય છે તે હંમેશા સત્ય જ હોય એવું જરૂરી નથી. સાચું સત્ય તો માણસના મર્મમાં છુપાયેલું હોય છે તેની પીડામાં, અધૂરી લાગણીઓમાં અને પોતાના સ્વાર્થ માટે લેવાયેલા નિર્ણયો પાછળના સંઘર્ષમાં.
લાગણીઓ તૂટે ત્યારે તેનું શું મર્મ? દિલ દુભાય ત્યારે તેની અંદરની ચીસ શું કહે છે? લાગણીઓના વહેણમાં વહાઈને લેવામાં આવેલા નિર્ણય પાછળનું સત્ય શું હોય છે? “મર્મ” એ દુઃખ છે, પ્રેમ છે, અફસોસ છે, એ માણસના દિલમાં છુપાયેલું એક રહસ્ય છે. મર્મ એટલે માણસના દિલની લડાઈ.
કાર્યક્રમ ટાફ ગ્રુપના વિશેષ સહયોગથી થયો હતો. મોટી સંખ્યામાં મિડીયા પ્રતિનિધિઓ, મહેમાનો, ટાફ ગ્રુપના સભ્યો અને અન્ય કલાકારો હાજર રહ્યા હતાં. વિશેષ ઉપસ્થિતિ તરીકે ગુજરાતી ફિલ્મ ઇન્ડસ્ટ્રીના અગ્રણી અને દિગ્ગજ કલાકાર ફિરોજ ઈરાની અને હિતેન કુમાર હાજર રહ્યા હતા. એ સિવાય પણ જાણીતાં ગાયક કલાકાર રાકેશ બારોટ, અભિનેત્રી જીલ જોશી, છાયા ઠાકોર, લોકપ્રિય ગાયક કલાકાર અરવિંદ વેગડા સહિતના કલાકારોની વિશેષ ઉપસ્થિત રહી હતી. તેમણે ફિલ્મની ટીમને શુભેચ્છાઓ પાઠવી અને ફિલ્મના વિષયવસ્તુની પ્રશંસા કરી હતી.
ટીઝર અને ગીતના લોન્ચ બાદ ઉપસ્થિત મહેમાનો તરફથી ફિલ્મને સકારાત્મક પ્રતિસાદ મળ્યો. ફિલ્મનું શીર્ષક, તેની રહસ્યમય રજૂઆત અને ભાવનાત્મક સંગીત દર્શકોમાં વધુ આતુરતા જગાવી રહ્યા છે.
Marm – Ek Bhed ટૂંક સમયમાં રિલીઝ થવાની છે અને ગુજરાતી ફિલ્મપ્રેમીઓમાં આ ફિલ્મ અંગે પહેલેથી જ ચર્ચાનો માહોલ સર્જાયો છે.
