Ahmedabad Cyber Crime: શેરબજારમાં રોકાણના નામે નિર્દોષ લોકોને લૂંટતી ચાઇનીઝ ગેંગના નેટવર્કને અમદાવાદ સાયબર ક્રાઇમ બ્રાંચે પકડી પાડ્યું છે. આંતરરાષ્ટ્રીય કૌભાંડમાં ચોંકાવનારો ઘટસ્ફોટ એ થયો છે કે, ઠગાઈના નાણાંને સગેવગે કરવામાં એક પ્રતિષ્ઠિત બૅન્કના અધિકારીઓ પણ સામેલ હતા. પોલીસે બૅન્ક મેનેજરો સહિત કુલ 5 આરોપીઓની ધરપકડ કરી છે.
કેવી રીતે આચરવામાં આવ્યું ફ્રોડ?
મળતી માહિતી અનુસાર, આ છેતરપિંડીની શરુઆત ડિસેમ્બર 2025માં થઈ હતી. ફરિયાદીને ’91 BARCLAYS-Stock Market Pioneer’ નામના વોટ્સએપ ગ્રૂપમાં એડ કરી IPO અને શેરબજારમાં જંગી નફાની લાલચ આપવામાં આવી હતી. ફરિયાદીને એક લિંક દ્વારા બોગસ ઍપ્લિકેશન ડાઉનલોડ કરાવાઈ. નફાના લોભમાં ફરિયાદીએ અલગ-અલગ ખાતાઓમાં કુલ 1.54 કરોડ રૂપિયા ટ્રાન્સફર કર્યા. જ્યારે રકમ પરત માંગવાનો સમય આવ્યો ત્યારે તમામ સંપર્ક તોડી નાખવામાં આવ્યા, જેથી છેતરાયેલા શખસે સાયબર ક્રાઇમમાં ફરિયાદ નોંધાવી.
આ પણ વાંચો: અમદાવાદ: વેજલપુરમાં આગના કારણે પિતા-પુત્રનું ગાઢ નિદ્રામાં જ મોત, માતા ઈજાગ્રસ્ત
કૌભાંડમાં કોની શું ભૂમિકા?
પોલીસ તપાસમાં બહાર આવ્યું કે ઇન્ડસન્ડ બૅન્કના કર્મચારીઓએ કમિશનની લાલચમાં નિયમો નેવે મૂકીને ચાઇનીઝ ગેંગને મદદ કરી હતી. ગોતા બ્રાન્ચ અકાઉન્ટ મેનેજર મહેશ તારાણી ખાતાધારકની ગેરહાજરીમાં જ મોબાઇલ નંબર અને ઈ-મેઇલ આઇડી બદલી નાખતો હતો. ન્યૂ ચાંદખેડા બ્રાન્ચ મેનેજર પૂજા પરીયત આખા કાવતરામાં સૂચનાઓ આપતી અને ખાતાધારકની જાણ બહાર નેટબૅન્કિંગ દ્વારા ફ્રોડના નાણાંની એફ.ડી. કરી દેતી. બૅન્ક મેનેજર હિના દિવ્યમ દરજી ફ્રોડના પૈસાથી જ્વેલર્સમાં જઈ સોનાની ખરીદી કરતી, જેથી રોકડને સોનામાં બદલી ગેંગના મુખ્ય સાગરીતો સુધી પહોંચાડી શકાય. સુરતના હરેશ મકવાણા કમિશન માટે પોતાનું બૅન્ક એકાઉન્ટ ગેંગને વાપરવા આપ્યું હતું. જ્યારે રાજુ મકવાણા નવા બૅન્ક ખાતા ખોલાવી ઠગાઈના નાણાંના ટ્રાન્ઝેક્શન સેટલ કરતો હતો.
સાયબર ક્રાઇમની ટીમે ટેકનિકલ એનાલિસિસના આધારે ભાવનગર, સુરત અને અમદાવાદમાં દરોડા પાડીને આ પાંચેય આરોપીઓને ઝડપી લીધા છે. તપાસમાં જાણવા મળ્યું છે કે આ ગેંગના છેડા ચીન સુધી જોડાયેલા છે. બૅન્ક કર્મચારીઓની સંડોવણીને કારણે હવે પોલીસ બૅન્કિંગ સેક્ટરમાં ચાલી રહેલા આવા અન્ય કૌભાંડોની પણ ઝીણવટભરી તપાસ કરી રહી છે.
