સાવલી તા.૨૬ સાવલી તાલુકાના જાલમપુરા ખાંડી ગામે આવેલા એક ફાર્મ હાઉસમાં ડભોઇ તાલુકાની કન્યાને ભગાડી જવાનો વહેમ રાખીને બોલાચાલી થતાં ભાજપના નેતા તેમજ ફાર્મ હાઉસના માલિક સી.કે. પટેલે બે રાઉન્ડ ફાયરિંગ કરતા ડભોઇ તાલુકાના એક યુવાનને ઇજા થતા તેને સારવાર માટે ખસેડવામાં આવ્યો છે.
પ્રાપ્ત માહિતી મુજબ ડભોઇ તાલુકાના એક ગામની કન્યા ઘરેથી ભાગી જવાનો બનાવ બન્યો હતો. ભાદરવા પાસે આવેલા ખાંડી ગામે આવેલ ફાર્મમાં નોકરી કરતો યુવક કન્યાને ભગાડી ગયો હોવાની શંકા રાખી ગઈ કાલે સાંજે કન્યાના સંબંધીઓ ખાંડી ખાતેના ફાર્મ પર પહોંચ્યા હતા અને બોલાચાલી થઈ હતી.
દરમિયાન યુવકે ફાર્મના માલિક સી. કે. પટેલને સમગ્ર ઘટનાની જાણ કરતા તેઓ પણ ફાર્મ પર આવી ગયા હતાં. કન્યાના સંબંધીઓ સાથે ફરી બોલાચાલી થતા ફાર્મના માલિકે હવામા ફાયરિંગ કર્યું હતું. ત્યારબાદ પણ મામલો થાળે ના પડતા ફરી એકવાર ફાયરિંગ કરતા ૪૩ વર્ષના નિમેશ રણછોડભાઇ બારીયા (રહે.બારીયા ફળિયું, ધરમપુરા ગામ, તા.ડભોઇ)ને હાથમાં ગોળી વાગી હતી.
ઘટનાને પગલે ફાર્મમાં નાસભાગ મચી ગઇ હતી તેમજ ઇજાગ્રસ્તને વડોદરાની સયાજી હોસ્પિટલમાં ખસેડતા તેની હાલત સ્થિર હોવાનું જાણવા મળ્યું છે. આજે ઘટનાની જાણ થતાં જ ભાદરવા પોલીસનો સ્ટાફ ફાર્મ પર પહોંચી ગયો હતો અને તપાસ હાથ ધરી હતી. પ્રાથમિક દ્રષ્ટિએ ફાર્મમાં થયેલી મારામારીમાં સ્વરક્ષણમાં ફાયરિંગ કર્યું હોવાનું જાણવા મળી રહ્યું છે. ગઇ સાંજે ફાર્મ પર પહોંચેલા ભાજપના નેતા સી.કે. પટેલની ગાડીના ડેશ બોર્ડ પર ભાજપના કમળના નિશાન સાથે જિલ્લા ઉપપ્રમુખ કિસાન મોરચા, વડોદરાનો ઉલ્લેખ હતો.
