Surat Corporation : સુરત પાલિકાની મગોબ ખાતેની 60 હજાર ચો.મી.થી વધુ જગ્યામાં પીપીપી ધોરણે હાઇટેક એમ્યુઝમેન્ટ પાર્ક-એન્ટરટેઇન્મેન્ટ પાર્કના કરાર કરીને સાત વર્ષથી પાલિકાના એન્યુઅલ ફી, ભાડા, પેનલ્ટીની રકમ પાલિકામાં જમા કરાવી ન હતી. પાલિકાની આ રકમ દબાવીને બેઠેલા ડેવલપરને પાલિકાએ ભાડા મુદ્દે મસમોટી રાહત જાહેર કરી છે. પાલિકાએ ઈજારદાર પાસેથી લેવાની રકમમાં 32 કરોડની મસમોટી રાહત આપવાની જાહેરાત કરી છે. આ ઉપરાંત બોનસમાં લીઝ મુદત આઠ વર્ષ લંબાવી આપવા તથા ડેવલપરને અન્ય એજન્સી સાથે સબલિઝ માટે પણ મંજુરી આપી દેવામાં આવી છે.
સુરત પાલિકાના વરાછા ઝોનમાં ડ્રાફટ ટીપી સ્કીમ નંબર 53 (મગોબ-ડુંભાલ)માં ફાઈનલ પ્લોટ નંબર આર-6 અને આર-8માં પીપીપી ધોરણે એમ્યુઝમેન્ટ પાર્ક-એન્ટરટેઇન્મેન્ટ પાર્ક માટે રાજગ્રીન એમ્યુઝમેન્ટ પાર્ક પ્રાઇવેટ લી. સાથે કરાર કરવામાં આવ્યો હતો. 60,000 ચો.મી.થી વધુ ક્ષેત્રફળ ધરાવતા આ પ્લોટ પર એમ્યુઝમેન્ટ પાર્ક-એન્ટરટેઇન્મેન્ટ પાર્ક બનાવી 45 વર્ષ માટે ઈજારો આપવામાં આવ્યો હતો. આ એજન્સી પાસેથી પાલિકાએ સાત વર્ષથી પાલિકાના એન્યુઅલ ફી, ભાડા, પેનલ્ટીની રકમ પેટે 54.94 કરોડ લેવાના થાય છે. પરંતુ એજન્સીએ આ રકમ નહી ભરતા પાલિકાએ બાકી નાણાંની વસુલાત માટે બન્ને પક્ષે મીડીયેરની નિમણૂક કરી હતી. આ મીડીયેટર દ્વારા બાકી નાણાંની વસુલાત માટે ત્રણ વિકલ્પ આપ્યા હતા.
આ વિકલ્પમાં જે પૈકી ડેવલપર દ્વારા તબક્કાવાર પ્રોજેક્ટ ડેવલપ કર્યો હોવાથી મીડિયેટરના અભિપ્રાય અન્વયે પ્રો-રેટા મુજબ એન્યુઅલ ફી, ભાડું, વ્યાજ, પેનલ્ટી વસૂલ કરવાનો નિર્ણય લેવામાં આવ્યો છે. ઓગસ્ટ 2025 થી આ વિકલ્પ પ્રમાણે 22.84 કરોડની વસુલાત કરવાની રહે છે તે વિકલ્પ માન્ય રાખવામાં આવ્યો છે. જોકે, આ રકમ આજની સ્થિતિએ તફાવત ઉમેરવામાં આવશે. આ વિકલ્પ સ્વીકારવા સાથે કુલ રકમ માંથી ડેવલપરને 32 કરોડની મસમોટી રાહત આપી દેવામાં આવી છે.
આ એજન્સી છેલ્લા સાત વર્ષ કરતા વધુ સમયથી પાલિકાની એન્યુઅલ ફી, ભાડા, પેનલ્ટીની રકમ દબાવી બેઠી હતી તેને મોટી રાહત આપી મોટો ફાયદો કરાવી દીધો છે. એટલું જ નહીં પરંતુ એક મહિનામાં 10 કરોડની ચૂકવણી કર્યા બાદ બાકીના પૈસા માટે ચાર હપ્તા પણ કરી આપવામાં આવ્યા છે. એજન્સી 10 કરોડની રકમ ભરપાઈ કરે ત્યાર બાદ પાલિકાએ ડેવલપરને સબ લીઝ માટે પણ મંજુરી આપી દીધી છે. આ ઉપરાંત 45 વર્ષનો સમય પૂરો થયા બાદ વધુ આઠ વર્ષ માટે લીઝ પણ લંબાવવાનો નિર્ણય કરવામાં આવ્યો છે.
