સાયબર ફ્રોડના નાણાં જે ખાતામાં જમા થયા તેની સાથે સંકળાયેલો હતો
કમ્બોડિયાની ગેંગની સંડોવણી ખૂલી હતી, ડિજિટલ એરેસ્ટના બધા કેસમાં અત્યાર સુધી નાની માછલીઓ જ પકડાઇ છે
રાજકોટ: રાજકોટના નિવૃત કોર્ટ કર્મચારી દિનેશભાઈ દેલવાડિયાને દિલ્હી ક્રાઇમ બ્રાંચના અધિકારીઓ તરીકેની ઓળખ આપી ડીજીટલ એરેસ્ટ કરી રૂા. ૮૮.૫૦ લાખ પડાવી લેવાયા હતાં. સાયબર ક્રાઇમ પોલીસે આ કેસમાં મધ્યપ્રદેશના ધાર જિલ્લાના બદનાવર ગામના રાહુલ શ્રીકૃષ્ણ પાટીદાર (ઉ.વ.૨૭)ને ઝડપી લીધો છે. તે સાથે જ આ કેસમાં ધરપકડનો આંક છ પર પહોંચ્યો છે.
આ અંગે ગત ઓગસ્ટ મહિનામાં સાયબર ક્રાઇમ પોલીસ મથકમાં ફરિયાદ નોંધાઇ હતી. તપાસના અંતે કમ્બોડિયાની ગેંગની સંડોવણી ખૂલી હતી. રાજકોટના અન્ય ડિજીટલ એરેસ્ટના કેસમાં પણ વિદેશી ગેંગની સંડોવણી ખુલી છે. આ ગેંગ તો પકડાતી નથી. પરંતુ જે ખાતાઓમાં ફ્રોડની રકમ જમા થઇ હતી. તેને પકડી સાયબર ક્રાઇમ પોલીસે ‘સંતોષ’ માનવો પડી રહ્યો છે.
ધરપકડ કરાયેલ રાહુલ અને અગાઉ પકડાયેલ કેતન જોશીએ દેવાંશ જોશી નામના એકાઉન્ટર હોલ્ડરનું ખાતુ ભાડે રાખ્યું હતું. જેમાં સાયબર ફ્રોડના રૂા. ૮૮.૫૦ લાખમાંથી રૂા. ૮ લાખ જમા થયા હતા. આરોપી રાહુલની આ ભૂમિકા ધ્યાને લઇ સાયબર ક્રાઇમ પોલીસે ધરપકડ કરી છે. અગાઉ પણ જે પાંચ આરોપીઓ પકડાયા હતા તે સાયબર ફ્રોડના નાણાં જે બેન્ક ખાતાઓમાં જમા થયા હતા તેની સાથે સંકળાયેલા હતા. ટૂંકમાં ડિજીટલ એરેસ્ટના કેસમાં નાની માછલીઓ જ પકડાઇ રહી છે. મગરમચ્છોનો આજ સુધી પત્તો લાગ્યો નથી.
