Ahmedabad News : જીટીયુની એકેડેમિક કાઉન્સિલની આજે બેઠક મળી હતી. જેમાં કેટલાક મહત્વના નિર્ણયો લેવાયા છે. જે મુજબ બી.ઈ એટલે કે ડિગ્રી ઈજનેરીમાં માર્ક આધારિત પ્રોબ્લેમ બેઝ લર્નિંગની નવી સિસ્ટમ તેમજ સામાજિક ઈન્ટર્નશિપ દાખલ કરવામાં આવી છે. આ ઉપરાંત પાંચમા સેમેસ્ટરથી વિદ્યાર્થીઓ મલ્ટી ડિસિપ્લિનરી ઓપન ઈલેક્ટિવ કોર્સ અંતર્ગત અન્ય બ્રાન્ચના વિષય પસંદ કરી શકશે અને ભણી શકશે.
માર્ક આધારિત પ્રોબ્લેમ બેઝ લર્નિંગની નવી સિસ્ટમ દાખલ
પાંચમા સેમ.થી વિદ્યાર્થી અન્ય બ્રાન્ચના વિષય લઈ શકશે. જીટીયુની એકેડેમિક કાઉન્સિલમાં એક સભ્યની નિમણૂંક કરવામાં આવી છે અને કાઉન્સિલના તમામ સભ્યોની આજે બેઠક મળી હતી. જેમાં કેટલાક વિદ્યાર્થીલક્ષી મુદ્દાઓને લઈને મહત્વના ઠરાવ પસાર કરવામાં આવ્યા હતા. જે મુજબ ડિગ્રી ઈજનેરી એટલે કે બેચલર ઓફ એન્જિનિયરિંગ કોર્સમાં સોસાયટલ ઈન્ટર્નશિપ દાખલ કરવા નિર્ણય કરવામાં આવ્યો છે. આ ઈન્ટર્નશિપ ફરજિયાત રહેશે અને જે વિદ્યાર્થીએ ચોથા અને પાંચમા સેમેસ્ટરની વચ્ચે કરવાની રહેશે. 10 થી 12 દિવસની આ ઈન્ટર્નશિપ રહેશે. આ ઈન્ટર્નશિપ પુરી કરનાર વિદ્યાર્થીને બે ક્રેડિટ ગુણ આપવામાં આવશે. વિદ્યાર્થીની ફાઈનલ માર્કશિટમાં આ ઈન્ટર્નશિપના ગુણ પણ અલગથી દર્શાવાશે.
બી.ઈ કરિક્યુલમમાં BIS અને એસડીજી ઉમેરવામાં આવશે
ડિગ્રી ઈજનેરી (બી.ઈ)ના હાલના અભ્યાસક્રમમાં વિવિધ બ્રાન્ચના કરિક્યુલમમાં બીઆઈએસ એટલે કે બ્યુરો ઈન્ડિયન સ્ટાન્ડર્ડ્સ તેમજ યુ.એનના સસ્ટેનેબલ ડેવલપમેન્ટ ગોલ્સ (એસડીજી)ને ઉમેરવાનો નિર્ણય કરવામાં આવ્યો છે. હાલની જરૂરિયાત પ્રમાણે અને વિદ્યાર્થીઓને મદદરૂપ થાય તે પ્રમાણે મેપિંગ કરીને બીઆઈએસ અને એસડીજીના ટોપિક કરિક્યુલમમાં ઉમેરવામાં આવશે.
આ ઉપરાંત બી.ઈમાં મલ્ટી ડિસિપ્લિનરી ઓપન ઈલેક્ટિવ કોર્સમાં કોઈપણ બ્રાન્ચનો વિદ્યાર્થી અન્ય બ્રાન્ચના વિષય પાંચમા સેમેસ્ટરથી સિલેક્ટ કરી શકશે. જેમ કે મિકેનિકલ કે સિવિલનો વિદ્યાર્થી કમ્પ્યુટર-આઈટી બ્રાન્ચનો સબ્જેક્ટ પસંદ કરી શકશે. વધુમાં બી.ઈમાં કેપસ્ટોન પ્રોજેક્ટ સીસ્ટમ પણ ઉમેરવામાં આવી છે.
